Pavlodarda balkon terezesinen qulaǵan 6 jasar bala kóz jumdy

PAVLODAR. KAZINFORM – Polıtsııa bıikten qulaý deregi boıynsha tekserý júrgizip jatyr. Jetkinshek erekshe kútimdi qajet etetin bala bolǵan. 

Pavlodar qalasynda qaıǵyly oqıǵa tirkeldi. 2019 jyly týǵan bala altynshy qabattaǵy terezeden qulap ketti.

– Bala alǵan jaraqattarynan keıin kóz jumdy. Belgili bolǵandaı, balkon shynylanǵan, al bala erekshe kútimdi qajet etken. Páterde anasy as úıde sharýamen aınalysyp júrgen. Sonymen qatar ápkesi de úıde bolǵan. Polıtsııa balanyń qulaý deregi boıynsha tekserý júrgizip jatyr. Tártip saqshylary kishkentaı balalardy ashyq terezesi nemese balkony bar bólmede qaraýsyz qaldyrmaýǵa shaqyrady, - dep habarlady óńirlik polıtsııa departamentinen.

Polıtseılerdiń aıtýynsha, balalardyń qulaý sebepteriniń biri – olardyń súıenip qalýǵa tyrysatyn, durys bekitilmegen masa torlary nemese ashyq turǵan tereze, balkon esikteri.

Qaıǵyly oqıǵalar kóp jaǵdaıda ata-anasy nemese týystary úıden shyǵyp ketkende, úı sharýasymen aınalysyp júrgende bolady. 

– Balany terezeden nemese balkonnan qulaý qaýpinen saqtaý – ár ata-ananyń qolynda. Terezege qorǵanyssyz masa toryn ornatpańyz. Arnaıy tereze qulpyn nemese kiltpen jabylatyn tutqalar ornatyńyz, olardy bala óz betinshe asha almaıdy. Balany tereze men balkonnyń janynda oınap júrgende qaraýsyz qaldyrmańyz. Olarǵa qaýipsizdik týraly sabaq berip otyrý mańyzdy. Saq jáne qyraǵy bolyńyzdar. Úıdegi balalardyń qaýipsizdigine birinshi kezekte ata-analar jaýapty ekenin umytpańyzdar, - deıdi óńirlik polıtsııa departamentiniń mamandary.

Eske sala keteıik, buǵan deıin Pavlodarda ashyq turǵan terezeden qulap ketken 5 jasar bala aman qalǵanyn jazǵan edik.