Pavlodarda balasyna alıment tólemegen áıeldiń bas bostandyǵy 1 jylǵa shekteldi
PAVLODAR. QazAqparat - 2021 jyly alıment tóleý boıynsha sot úkimin nemese sheshimin oryndamaǵany úshin óńirdiń 67 turǵyny Qazaqstan Respýblıkasy ÁQBtK 669-baby boıynsha ákimshilik jaýapkershilikke tartyldy, dep habarlaıdy QazAqparat Pavlodarnews.kz saıtyna silteme jasap.
Oblystyq polıtsııa departamenti baspasóz qyzmetiniń málimetinshe, alımentterdi qasaqana tólemegen 4 adam qylmystyq jaýapkershilikke tartylǵan.
- 2018 jyly sot Pavlodar qalasynyń 37 jastaǵy turǵynynan balalar úıinde turatyn kishkentaı ulyn asyraýǵa alıment óndirip alý týraly sheshim qabyldady. Sot sheshimi boıynsha áıel aı saıyn ulyna jalaqysynyń 1/4 bóligin kámeletke tolǵanǵa deıin tóleýi kerek edi. Alaıda, ol barlyq talaptardy elemeı, balasyna eshqashan aqsha tólemegen. Sot aktilerin oryndaý mindettiligi týraly sot oryndaýshylarynyń jazbasha habarlamalary men eskertýlerine eshqandaı áreket jasamaǵan jáne paıda bolǵan bereshekti óteý boıynsha sharalar qabyldamaǵan, - dedi polıtsııa departamenti anyqtaý basqarmasynyń basshysy Qabdýlmanap Akebaev.
Osyǵan baılanysty sot áıeldi Qazaqstan Respýblıkasy ÁQBtK-niń 669-babynda kózdelgen «Sot úkimin, sot sheshimin nemese ózge de sot aktisi men atqarý qujatyn oryndamaý» boıynsha quqyq buzýshylyq jasaǵany úshin kináli dep tanyǵan jáne bir táýlik merzimge ákimshilik qamaýǵa alý túrinde ákimshilik jazaǵa tartylǵan. Alaıda osydan keıin de tıisti qorytyndy shyǵarmaǵan.
Osy ýaqyt ishinde áıel jumys istep, jalaqy alǵan, biraq ony sot oryndaýshysynan jasyrǵan.
- Búgingi tańda áıel óziniń 5 jasar ulyna 1,5 mln teńgeden astam qaryz. Sondyqtan 2021 jylǵy 9 maýsymda Pavlodar oblysynyń kámeletke tolmaǵandardyń isteri jónindegi mamandandyrylǵan aýdanaralyq soty onyń balany kútip-baǵýǵa qarajat tóleý jónindegi mindetterdi oryndamaǵany úshin QR Qylmystyq Kodeksiniń 139-baby boıynsha 1 jylǵa bas bostandyǵyn shektedi, - dedi Qabdýlmanap Akebaev.
