Pavlodarda balalarǵa zorlyq-zombylyq kórsetýge qatysty 27 qylmys jasalǵan
PAVLODAR. KAZINFORM - Oblysta jyl basynan 20 balanyń jynystyq qol suǵylmaýshylyq quqyǵy buzylǵan. Olarǵa qarsy zorlyq-zombylyq kórsetý boıynsha 27 qylmys tirkelgen.
Óńirde balalardy zorlyq-zombylyqtan qorǵaý, sýıtsıdtiń aldyn alý jáne quqyqtary men salamattyǵyn qamtamasyz etý maqsatynda 2023-2025 jyldarǵa arnalǵan keshendi jospar, sondaı-aq balalar men jasóspirimder arasynda býllıng pen qatygezdiktiń aldyn alý jónindegi 2023-2026 jyldarǵa arnalǵan Jol kartasy iske asyrylyp jatyr. Keshendi jumystarǵa qaramastan jyl basynan jynystyq qol suǵylmaýshylyqqa qarsy qylmystar óse túsken.
- Jyldyń alǵashqy jeti aıynda jynystyq qol suǵylmaýshylyqqa qarsy 27 qylmys anyqtaldy. Qylmystyq áreketter jalpy sany 20 balaǵa qatysty jasalǵan. Bul ótken jyldyń sáıkes kezeńimen salystyrǵanda 5% - ǵa joǵary. Al kámeletke tolmaǵandar arasynda sýıtsıd kórinisteriniń 10 deregi tirkeldi. Abyroı bolǵanda ólim jaǵdaıymen aıaqtalǵan sýıtsıd jaıttary joq, - deıdi Pavlodar oblysy bilim berý basqarmasy basshysynyń orynbasary Alma Aıtýarova.
Bilim berý basqarmasy kámeletke tolmaǵandardyń jynystyq qolsuǵylmaýshylyǵyna qarsy quqyq buzýshylyqtardyń jáne jasóspirimder qylmysynyń aldyn alý máseleleri boıynsha keshendi jumystar júrgizip otyr. Árbir is-sharaǵa jaýapty tulǵalar (qalalar men aýdandardyń ákimdikteri, memlekettik organdar) bekitilgen, oblysta keshendi jospardy iske asyrý jónindegi jumys toby qurylǵan. Quqyq buzýshylyq jasaǵan, zorlyq-zombylyq saldarynan zardap shekken, áreket jasaǵan nemese aıaqtalǵan sýıtsıd jasaǵan balalar men jasóspirimder týraly densaýlyq saqtaý organdarymen, polıtsııa departamentimen aqparat almasý jolǵa qoıylǵan.
Balalardy zorlyq-zombylyqtan qorǵaý, sýıtsıdtiń aldyn alý, olardyń quqyqtary men ál-aýqatyn qamtamasyz etý maqsatynda Óńirlik psıhologııalyq qoldaý ortalyǵy qurylǵan.
Ortalyqtyń psıhologtary men zańgeri jyl basynan bilim alýshylarǵa, ata-analar men pedagogterge 800-den astam keńes bergen. Trenıngtermen 1400-den astam adam qamtylǵan.
- Sońǵy ýaqytta balalar arasyndaǵy qylmystyń artýyna birneshe faktor áser etýi múmkin. Olardyń ishinde áleýmettik ortadaǵy teris áserler, otbasyndaǵy tárbıe úrdisiniń álsizdigi, ortanyń jaǵymsyz áserleri, sondaı-aq ınternet pen áleýmettik jeliler arqyly beriletin teris aqparattar erekshe oryn alýy múmkin. Bul máseleni sheshýdiń joldaryna kelsek, eń aldymen, otbasy jáne mekteptiń rolin joǵarylatý kerek. Balalarǵa durys tárbıe berip, olardyń psıho-emotsıonaldy damýyna qamqorlyq jasaý mańyzdy. Sonymen qatar, áleýmettik jumystardy kúsheıtip, jastardy jaman joldan qaıtarýǵa baǵyttalǵan baǵdarlamalar júrgizý qajet. Qoǵamda, ásirese, jastar ortasynda oń mysaldar men jaǵymdy tárbıe úlgilerin keńinen nasıhattaý kerek. Aqparattyq qaýipsizdik júıeleri men onlaın-qorǵanys sharalaryn da jetildirip, balalardy zııandy kontentten qorǵaý mańyzdy, - deıdi Alma Aıtýarova.
Jalpy kámeletke tolmaǵandarǵa qatysty jynystyq qol suǵýshylyq asa aýyr qylmystar sanatyna jatatynyn jáne ol qoǵam úshin asa qaýipti ekenin aıtýymyz kerek. Mundaı qylmys Konstıtýtsııamen jáne halyqaralyq sharttarmen kepildik berilgen balanyń negizgi quqyqtary men bostandyqtaryn buzady. Ári kámeletke tolmaǵandardyń densaýlyǵy men psıhıkasyna aýyr zardaptar keltiredi.
Byltyr Pavlodar oblysynda aǵasy men qaryndasy jynystyq zorlyqqa ushyraǵany týraly jazǵan bolatynbyz.
Májilis depýtaty Magerram Magerramov balalarǵa zorlyq-zombylyqty lańkestik qylmyspen teńestirý qajet degen usynys aıtqan.