Pavlodarda balalardy qaǵyp ketken tramvaı júrgizýshisi eki jylǵa sottaldy
PAVLODAR. QazAqparat - Pavlodarda sońy qaıǵyly aıaqtalǵan jol apatyna qatysy bar 30 jastaǵy tramvaı júrgizýshisine qatysty sot protsesi aıaqtaldy, dep habarlaıdy pavlodarnews.kz .
Qylmystyq ister jónindegi Pavlodar qalasynyń №2 soty tramvaı júrgizýshisin QR QK-niń 345-baby, úshinshi bóligi boıynsha kináli dep tapty. - Kólik basqarýmen baılanysty qyzmetpen aınalysý quqyǵynan bes jylǵa aıyrý jáne qonys kolonııasysynda bas bostandyǵyna shekteý qoıý túrinde jaza taǵaıyndalsyn, - dedi sýdıa Dýman Serikbaev. Sonymen qatar, sot Pavlodar tramvaı basqarmasynyń basshylyǵyna jumys istemeıtin spıdometri bar tramvaıdy jolǵa shyǵarǵan jaýapty tulǵalardy qatań tártiptik jaýapkershilikke tartý úshin jeke qaýly shyǵardy.
Eske sala keteıik, jantúrshigerlik jol apaty 7 qyrkúıek kúni bolǵan. Tramvaı rettelmeıtin jaıaý júrginshiler ótkelinen ótip bara jatqan eki qyzdy qaǵyp ketken. Saldarynan úlkeni - Mahabbat oqıǵa ornynda kóz jumdy. Shynar Ýálıtovanyń balalaryn jalǵyz ózi ósirip otyrǵanyn bilgen pavlodarlyq «Eriktiler klýby» men oblystyq bilim salasynyń qyzmetkerleri qaıyrymdylyq sharasyn uıymdastyrdy. Halyqtyń jınalǵan qarjysyna zardap shekken otbasyǵa Ekibastuz qalasynan úsh bólmeli páter satyp alynyp, qajetti jıhazdary jetkizildi. Al, eki mıllıonnan astam jınalǵan teńgeni Shynar shuǵyl otaǵa muqtaj balalardyń otbasyna aýdaryp berdi.
Eń sońǵy sózinde vagon júrgizýshisi qyzdyń ólimi úshin anasynan taǵy bir márte keshirim surap, bostandyǵynan aıyrmaýdy jáne óziniń alty jasar qyzyn tárbıeleýge múmkindik berýdi ótindi.
