Pavlodarda balalardyń zańsyz áreketi úshin ata-analar jaýapqa tartyldy

PAVLODAR. KAZINFORM — Bıylǵy jyly jasóspirimderdiń tarapynan 97 quqyq buzýshylyq tirkeldi, dep habarlaıdy QR ІІM baspasóz qyzmeti.

Mekteptiń kıim aýystyratyn bólmesinde oqýshy gaz ballonyn shashqan. Sonyń áserinen bólmede ótkir ıis paıda bolyp, oqýshylar jótelip, kózderi qyzardy. Alaıda eshkim aýyr jaraqat alǵan joq. Jasóspirimniń tártipsizdigi boıynsha zańdy ókiline ákimshilik is qozǵalyp, sot otyrysy ótti.

Oqýshy óz áreketine ókinetinin aıtyp, endi mundaı qadamǵa barmaıtynyna ýáde berdi.

Taǵy bir oqýshy 102 operatoryna uıaly telefonnan qońyraý shalyp, «mektepke bomba qoıylǵan» dep habarlaǵan. Polıtsııa qyzmetkerleri abonent nómiriniń ıesin tez anyqtady. Ol Pavlodar qalasynyń 12 jastaǵy oqýshysy bolyp shyqty.

Kompıýterlik oıyn sıýjetinen «shabyt» alǵan jasóspirim ınformatıka sabaǵynda otyrǵan kezde mektepke polıtsııa men basqa da qyzmetkerler kelgende synyptastarynyń kóńilin kóteremin dep oılaǵan. Ol kámelet jasyna jetpegendikten, onyń áreketi úshin zańdy ókili ákimshilik jaýapkershilikke tartyldy.

— El zańnamasyna sáıkes, kámeletke tolmaǵandardyń quqyqqa qaıshy áreketteri úshin zańdy ókilderi jaýapkershilikke tartylady. Bıylǵy jyldyń basynan beri balalardy durys tárbıelemeý boıynsha 835 ata-ana ákimshilik jaýapkershilikke tartyldy. Olardyń 159-y qoǵamdyq oryndarda mas kúıde bolǵan, 47-i balalardyń jeńil quqyq buzýshylyǵy, — dep málimdedi polıtseıler.

Kámeletke tolmaǵandardyń qatysýymen jasalǵan zań buzýshylyqtar árdaıym polıtsııanyń baqylaýynda bolady. Bıylǵy jyly jasóspirimderdiń tarapynan 97 quqyq buzýshylyq tirkeldi.

— Zań shynymen de balalardyń áreketi úshin ata-analardy jaýapqa tarta alady. Biraq eń tıimdi ádis — ýaqytynda tárbıege aralasý, balanyń oıyn tyńdaý jáne qoldaý kórsetý. Jaýapkershilik sottan emes, kúndelikti otbasy ishindegi dıalogtan bastalady, — dep atap ótti polıtsııa qyzmetkerleri.

Buǵan deıin Pavlodarda magnıt arqyly esirtki jasyryp júrgen 23 jastaǵy kúdikti ustalǵanyn jarııaladyq.