Pavlodarda balalardy urdy dep aıyptalǵan tárbıeshi sottaldy

PAVLODAR. KAZINFORM — Oblys ortalyǵyndaǵy № 116 balabaqshanyń burynǵy tárbıeshisinen 16 bala zardap shekkeni anyqtaldy. Sot oǵan 4,5 jyl bas bostandyǵynan aıyrý jazasyn belgiledi. Biraq ázirshe kolonııaǵa jiberilmeıdi.

Atalǵan is sotta «Qınaý» jáne «Kámeletke tolmaǵan balany tárbıeleý jónindegi mindetterdi oryndamaý» baptary boıynsha qaraldy. 33 jastaǵy burynǵy tárbıeshi óz kinásin tolyq moıyndaǵan. Sot usynylǵan dáleldemelerdi zertteı kele, bas bostandyǵynan aıyrý jazasyn kesti.

— Qylmystyq kodekstiń 58-babynyń 3, 5-bólimderin negizge ala otyryp, qylmystyq quqyq buzýshylyqtardyń jıyntyǵy boıynsha jeńil jazany aýyr jazaǵa aýystyrý arqyly túpkilikti 4 jyl 6 aı merzimge bas bostandyǵynan aıyrý jazasy taǵaıyndalsyn, — dep úkimdi oqydy Pavlodar oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń sýdıasy Juldyz Kamalova.

Sot sottalǵan áıeldiń kishkentaı balalary bar ekenin eskere otyryp, jazany óteýdi 5 jylǵa shegere turý týraly sheshim qabyldady.

Úkim zańdy kúshine engen joq. Ázirshe zardap shekken 16 balanyń keıbir ata-analary apellıatsııalyq shaǵym túsirý múmkindigin joqqa shyǵarmaıdy.

Eske sala keteıik, byltyr jazda Pavlodardaǵy balabaqshanyń birinde balalardy shashynan julqyp, shapalaqpen uryp jatqan áıel adamnyń beınejazbasy tarap ketken edi.