Pavlodarda balalar úılerindegi qyzdardy zorlaýdyń taǵy 11 deregi tirkeldi

PAVLODAR. KAZINFORM - Prokýratýranyń pármenimen Pavlodardyń balalar úıleri men balalardy qoldaý ortalyqtaryndaǵy 105 qyz medıtsınalyq tekserýden ótti. Tekserý nátıjeleri 11 tárbıelenýshi boıynsha jynystyq qol suǵýshylyqty anyqtady.

Buǵan deıin oblystaǵy balalar úıleri men balalardy qoldaý ortalyqtarynda tárbıelenip jatqan 10-16 jas aralyǵyndaǵy qyzdar medıtsınalyq tekserý ótkizilip jatqany týraly habarlaǵanbyz.

Prokýratýra organdary uıytqy bolǵan dárigerlik tekserýmen kámelet jasyna jetpegen 105 qyz bala qamtylǵan.

- Tekserý barysynda 11 qyzdyń erte bastan páktiginen aırylǵany tirkelip otyr. Onyń 8-i qazirgi ýaqytta Sotqa deıingi tergep-tekserýdiń biryńǵaı tizilimine alyndy. Olar boıynsha sotqa deıingi tekserý bastaldy, kúdiktiler anyqtalyp, ustaldy. Úsh derek qylmystyq quqyq buzýshylyq boıynsha tekserilip jatyr. Buǵan qosa balalardyń úı jaǵdaıyndaǵy jynystyq zorlyq-zombylyqqa ushyraýyna qatysty eki derek tirkelip otyr,-dep habarlady bala quqyqtary jónindegi óńirlik ýákil Sáýle Shákenova.

Bul qylmystardyń barlyǵyna birneshe jyl bolǵan. Tekserýlerdiń nátıjesinde endi ashylyp otyr.

Eske sala keteıik, ótken aptada Pavlodar oblysynyń aýmaǵynda kámelet jasyna jetpegen balalardy zorlaýdyń tórt birdeı deregi tirkeldi.

Eń áýeli Baıanaýyl aýdany Maıqaıyń kentinde kámelet jasyna tolmaǵan qyzdy ógeı ákesi zorlap kelgeni týraly jaǵymsyz aqparat tarady.

Odan soń dál osy atalǵan eldi mekende 2009 jylǵy aǵasy men 2008 jylǵy qyz balany eki er adam zorlaǵany týraly quzyrly organdar resmı aqparat taratty.

Al keıinirek Jelezın aýdanynda osydan 6 jyl buryn qorǵanshylyǵyna alǵan jetim qyzdy zorlap, bul qylmysyn polıtsııa bilip qoıǵan soń ańshy myltyǵymen ózin atyp óltirgen er adam týraly jazdyq.