Pavlodarda balalar tegin jattyǵatyn jańa boks zaly ashyldy
PAVLODAR. QazAqparat - Pavlodar qalasynda jańadan ashylǵan «ARGOS» dep atalatyn boks zalynda 12 jasqa deıingi balalar tegin jattyǵatyn bolady, dep habarlaıdy pavlodarnews.kz .
Sharaǵa Pavlodar qalasynyń ákimi Nurjan Áshimbetov jáne birqatar sport ardagerleri qatysyp, zaldyń qural-jabdyqtarymen tanysyp kórdi. Sondaı-aq, olar kásipkerdiń ıgi bastamasyna alǵys aıtyp, tárbıelenýshilerge sportta úlken jeńis tiledi.
Jańa sport nysany «Agropromstroı-PV» JShS-niń qarjylandyrýymen jabdyqtalǵan. Kásiporynnyń basshysy Artem Fılıppınniń aıtýynsha, zaldy tolyǵymen kúrdeli jóndeýden ótkizip, sońǵy úlgidegi zamanaýı sporttyq qural-jabdyqtarymen tolyqtyrý úshin úsh mıllıonǵa jýyq teńge bólgen.
Sport klýbynyń jalpy aýmaǵy - 237 sharshy metr. Jańa jattyǵý zalynda jýynatyn jáne kıim aýystyratyn bólmeler, soqqyǵa arnalǵan maneken, qolǵap, grýshalar jáne jekpe-jek ótetin sharshy alań bar.
«12 jasqa deıingi balalardy tegin qabyldasaq, eresekterdi aqyly jattyqtyramyz. Munda negizinen № 5 balalar-jasóspirimder sport mektebiniń jáne balalar-jastar sport ortalyǵynyń tárbıelenýshileri keledi. Maqsatymyz - Pavlodardan bolashaqta álem jáne olımpıada chempıondaryn shyǵarý», - deıdi Artem Fılıppın.
