Pavlodarda balalar arasynda vırýsty ınfektsııa órship, aýrýhana naýqastarǵa tolyp qaldy

PAVLODAR. KAZINFORM - Óńirlik balalar aýrýhanasynyń dárigerleri kúnine shamamen 100-120 balany qabyldap jatqandaryn aıtady.

Balalar jedel jáne jiti respıratorlyq vırýstyq ınfektsııaǵa (JRVI) jıi shaldyǵady. Qazirdiń ózinde oblystyq balalar aýrýhanasynda JRVI (jedel respıratorlyq vırýsty ınfektsııa) jáne JRA (jedel respıratorlyq aýrýlar) dıagnozymen 230-dan asa bala jatqyzylǵan. 

Dárigerlerdiń aıtýynsha, úıde aýyryp jatqan balalar da kóp. Ata-analar balalarynyń qyzýy uzaq ýaqyt túspeıtinine alańdaýly. Kóp jaǵdaıda jótel qysady. Jurtshylyq arasynda «bul kovıdtyń bir túri» degen áńgime jeldeı esip tur.

Deıturǵanmen dárigerler bul maýsymdyq sýyq tııý ekenin aıtyp, kópshiliktiń alańdamaýǵa shaqyryp otyr.

- Kúzgi kezeńde bizde vırýsty respıratorlyq ınfektsııalar men tumaý maýsymy bastalady. Bul - maýsymdyq ınfektsııa. Balalardyń kovıd juqtyrǵan ózge balalarmen birge jatqany týraly rastalǵan aqparat joq, - dep habarlady óńirlik balalar aýrýhanasynan.

Balalar aýrýhanasynyń málimetinshe, munda kún saıyn 100-120 naýqas bala qabyldanady. Biraq barlyǵy aýrýhanaǵa jatqyzylmaıdy. Qazirgi kúni juqpaly aýrýlar statsıonarynda 236 bala em alyp jatyr.

-Statsıonar tolyq qýatta jumys istep jatyr, qajet bolǵan jaǵdaıda qosymsha tósek-oryndar ornalastyrýǵa daıynbyz, - dep qosty aýrýhanadan.

Eske sala keteıik buǵan deıin Densaýlyq saqtaý vıtse-mınıstri Tımýr Muratov ınfektsııalyq statsıonarlarǵa naýqastardyń kóbirek kelip jatqanyn rastaǵan edi.