Pavlodarda bala kútýshi úı ıelerin tonap ketti
PAVLODAR. QazAqparat – Pavlodar oblysynda 33 jastaǵy bala kútýshi bir aıdan astam ýaqyt jumys istegen otbasynyń úıinen 1000 dollar men 500 eýro urlap ketti, dep habarlaıdy «QazAqparat» HAA tilshisi.
«Pavlodar qalasynyń turǵyny sábıiniń qaýipsizdigi úshin bala kútýshini jeke habarlandyrýlardan jaldamaı, agenttikterdiń biriniń qyzmetine júgingen. Onda oblys ortalyǵynyń 33 jastaǵy turǵynyn jaldaýǵa keńes berilgen. Bala baǵýshy bul otbasynda bir aıdan astam ýaqyt jumys istegen. Ata-ananyń kútýshiniń jumysyna kóńili tolǵan. Alaıda, kúnderdiń bir kúni áıel úı ıeleriniń joqtyǵyn paıdalanyp, 1000 AQSh dollar jáne 500 eýro kóleminde aqshany urlap ketken», - dep málim etti Pavlodar oblysy Polıtsııa departamentiniń baspasóz qyzmetinen.
Departamentten habarlaǵandaı, polıtseıler urlyq jasady degen kúdikpen bala kútýshini qolǵa túsirdi.
«Áıeldiń aıtýynsha, ol aqshany óz qajettilikterine – nesıesin jabý úshin jumsaǵan. Atalmysh derek boıynsha QR QK-niń 188-babyna sáıkes sotqa deıingi tergeý júrgizilip jatyr», - dedi polıtsııadan.
Avtory Anton Gagarın
