Pavlodarda «Baqytty otbasy» boıynsha qujattardy qabyldaý bastaldy
NUR-SULTAN. QazAqparat –Bul baǵdarlamanyń kómegimen kóp balaly, tolyq emes jáne múmkindigi shekteýli balalardy tárbıelep otyrǵan otbasylar turǵyn úı qunynyń 10% bastapqy jarnasyn tólegen jaǵdaıda 20 jylǵa deıin kredıt berý merzimimen jyldyq 2% stavka boıynsha qaryz ala alady, dep habarlaıdy pavlodarnews.
Qujattardy 22-31 shilde aralyǵynda Krıvenko kóshesi, 25 mekenjaıy boıynsha Open Pavlodar keńsesinde №13 ústelde qabyldaıdy.
Qalalyq TKSh bólimi turǵyn úıdi bólý sektorynyń meńgerýshisi Aqerke Elamanovanyń aıtýynsha, búgin tańerteńnen bastap Pavlodardan 50 otbasynyń qujattary qabyldandy. Spıker baǵdarlamaǵa kópbalaly nemese tolyq emes otbasylar, múmkindigi shekteýli balalardy tárbıelep otyrǵan otbasylar qatysa alady dep túsindirdi.
Bul rette olar joǵaryda kórsetilgen sanattardyń biri boıynsha turǵyn úı alýǵa kezekte turýy tıis, al otbasynyń árbir múshesine shaqqandaǵy tabysy 42 500-den aspaýy tıis. Degenmen, ótinish berýshi tóleýge qabiletti bolýy tıis: ıaǵnı, jumysy bolýy kerek. Eger de anasy bala kútimimen demalysta bolsa, baǵdarlamaǵa ákesi qatysa alady.
Taǵy bir aıta keterlik jaıt - otbasynda ótelmegen nesıe bolmaýy kerek. Eger ondaı bolsa, onda ótinish berýshi olardy óteı alady, mysaly, búgin, al erteń baǵdarlamaǵa qatysýǵa ótinish bere alady.
«Ótinimderdi qabyldaý lımıti joq. Biz barlyq qujattardy 31 shildege deıin qabyldaımyz. Turǵyn úı alý kezeginde 4 myń tolyq emes otbasy, 135 múgedek balalardy tárbıelep otyrǵan otbasy, 411 kóp balaly otbasy tur. Eger olardyń barlyǵy «Baqytty otbasy» baǵdarlamasyna qatysqysy kelse, biz barlyq qujattardy qabyldaımyz. Aldymen qujattardy 31 shildege deıin qabyldaıtyn bolamyz, keıinirek olardy turǵyn úı qurylys jınaq bankine tapsyramyz. Baǵdarlama úsh jylǵa eseptelgen jáne bıylǵy jyly tapsyrystaryn maquldamaǵandar kelesi jyly baǵyn synap kóre alady», - dep atap ótti Aqerke Elamanova.
Turǵyn úıdi bólý sektorynyń meńgerýshisi atap ótkendeı, tórt jáne odan da kóp kámeletke tolmaǵan balalar men joǵary oqý oryndarynda nemese kolledjderde oqıtyn 23 jasqa deıingi balalar tárbıelep otyrǵan otbasylar kóp balaly bolyp esepteledi. Baǵdarlamaǵa qatysýshy 10 mln teńgege deıin turǵyn úı satyp alýǵa qaryz ala alady.
Turǵyn úıdi bastapqy jáne qaıtalama naryqtan nemese jeke úı satyp alýǵa
bolady. Ótinish berý úshin ózimen birge ótinish, jeke
kýálik, neke qııý nemese buzý týraly kýálik nemese jubaıynyń qaıtys bolýy týraly
kýálik, balalardyń týý týraly kýáligi, ótinish berýshi men onymen birge turaqty
turatyn otbasy múshelerin tirkeý týraly mekenjaı anyqtamasy, jyljymaıtyn múlik
týraly anyqtama, memlekettik járdemaqylar men alımentter esebinsiz sońǵy jarty
jyl ishindegi tabysy týraly málimetter, sondaı-aq ótinish berýshiniń sanatyn
rastaıtyn qujat bolýy qajet. Bul qujattardyń kóshirmeleri ǵana qabyldanady.
