Pavlodarda azyq-túlik pen kókónis ónimderi qymbat baǵaǵa satylyp kelgen
PAVLODAR. KAZINFORM — Jyl basynan beri oblystaǵy satýshylarǵa 71 aıyppul salynǵan. Olardyń basym bóligi áleýmettik mańyzy bar azyq-túlik taýarlarynyń baǵasyn shekten tys ósirýge qatysty.
Saýda ústemesiniń ruqsat etilgen shekti mólsherinen asyp ketýi týraly óńirlik saýda jáne tutynýshylardyń quqyqtaryn qorǵaý departamentinen málimdedi. Jyldyń alǵashqy toqsanynda kartop, sábiz, qııar, pııaz, qyryqqabat, rojkı, kúrish, qant, kúnbaǵys maıy, tuz, qaraqum jarmasy, birinshi sanatty jumyrtqa ónimderi boıynsha baǵanyń shekten tys ósirilgeni anyqtalǵan.
— Pavlodar oblysy boıynsha ekonomıkalyq tergep-tekserý departamentiniń materıaldary negizinde jospardan tys tekserýler júrgizildi. Máselen jetkizýshi kartoptyń kılogramyn 170 teńgeden satyp alyp, 201 teńgeden ótkizgen. ıAǵnı 18%-ǵa deıin saýda ústemesin qosqan. Al talap boıynsha ol 15%-dan aspaýy tıis. Bul rette baǵasy asyrylǵan ónim bes saýda nysanyna jetkizilgen, bul zań buzýshylyqtyń júıeli sıpatyn kórsetedi. Jyl basynan beri satýshylarǵa 71 aıyppul salyndy, — dep habarlady departamentten.
Jergilikti dúkenderdiń birinde sábizge qosylǵan saýda ústemesi 96%-dy quraǵan. Satýshy ony 130 teńgeden satyp alyp, 255 teńgeden satqan. Taǵy bir jaǵdaıda, qııardy 1650 teńgeden satyp alyp, 2585 teńgeden saýdalap kelgen.
Eske sala keteıik, álemde azyq-túlik baǵasy úshinshi aı qatarynan qymbattap jatyr.
