Pavlodarda azyq-túlik baǵasy bir aıda qalaı ózgerdi
PAVLODAR. KAZINFORM — Pavlodar oblysynda tamyz aıynda birqatar kókónis baǵasy aıtarlyqtaı tómendedi. Atap aıtqanda, sábiz 40%-ǵa, kartop 24,4%-ǵa arzandaǵan.
Ulttyq statıstıka bıýrosy Pavlodar oblysy boıynsha departamentiniń málimetterine súıensek, tamyz aıynda qyryqqabattyń baǵasy 15,7%-ǵa, pııaz 7,8%-ǵa, alma 2,2%-ǵa tómendegen.
— Sondaı-aq sábiz 40%-ǵa, kartop 24,4%-ǵa arzandaǵany baıqaldy. Qyzanaq pen qııar baǵasy kerisinshe bir aıda shamamen 5%-ǵa ósken. Azyq-túlik taýarlarynyń jekelegen túrleri boıynsha da baǵa ósimi tirkeldi. Jumyrtqa 6,1%-ǵa, makaron ónimderi 1,9%-ǵa, et 1,3%-ǵa, jarma jáne dándi daqyldardan jasalǵan ónimder 1,1%-ǵa qymbattaǵan. Almurttyń baǵasy 2,7%-ǵa ósken, — dep habarlady departamentten.
Jalpy azyq-túlik taýarlary tobynda jumyrtqa, makaron ónimderi, et, jarma jáne dándi daqyldardan jasalǵan ónimder baǵasynyń ósýi tirkelgen.
Budan bólek, tamyz aıynda alkogoldi ishimdikter men temeki ónimderiniń baǵasy 1,8%-ǵa ósken. Azyq-túlikke jatpaıtyn taýarlar arasynda jıhaz jáne úı sharýashylyǵyna qajetti zattar 2,8%-ǵa, turmystyq quraldar 1,1%-ǵa, farmatsevtıkalyq ónimder 0,3%-ǵa qymbattaǵan. Qyzmet kórsetý salasynda jolaýshylar kóligi qyzmetteriniń baǵasy 1,8%-ǵa, elektr energııasy 1,2%-ǵa ósken.
Buǵan deıin áleýmettik azyq-túlik baǵasy qaı qalalarda arzandaǵanyn jazǵanbyz.
