Pavlodarda Azamattyq alıans úıi ashyldy
ASTANA. QazAqparat - Pavlodarda ashylǵan Azamattyq alıans úıinde óńirdegi 12 eń tıimdi úkimettik emes uıymnyń keńseleri men zal, kovorkıng ortalyq ornalasqan, dep habarlaıdy pavlodarnews.kz.
Munda uıymdar kezdesýler men trenıngter uıymdastyrady. Azamattyq úıi Lermontov kóshesi, 44 mekenjaıy boıynsha burynǵy «Jiger» klýbynda ornalasqan. Bul jerde Meıirimdiler klýby, oblystyq «Jasyl el» jastar shtaby, Geografııa úıi, óńirlik «Jartylaı qyzyl aı» fılıaly, «Úmit úzbeý» jáne basqa da belgili uıymdar jumys isteıdi. Múmkindigi shekteýli jandarǵa arnalǵan jeke kiretin esik jasalǵan. 
Pavlodar oblystyq Azamattyq alıansynyń tóraıymy Svetlana Mogılıýktyń aıtýynsha, eń tıimdi úkimettik emes uıymdardy bir shańyraqtyń astyna biriktirý týraly sheshim jýyrda ótken Azamattyq forýmda qabyldanǵan. Bul bastamany oblystyq ákimdik te qoldaǵan.
- Ózińniń jeke keńseń bolǵanda kóp jospar qurýǵa bolady, - deıdi Svetlana Mogılıýk. - Áriptestermen qaı jerge kezdesý uıymdastyrý kerek dep bas qatyrmaısyz. Pavlodar oblysynyń úkimettik emes uıymdary joǵary kásibı sheberligimen erekshelenedi. Biz mundaı orynnyń ashylǵanyna óte qýanyshtymyz.
Bul meıirimdiler klýby úshin - ekinshi keńse. Atalǵan uıymnyń keńeıgeni sonshalyqty, tipti, Eriktiler úıinde oryn tar boldy. Sondyqtan Azamattyq alıansynda qoımasy bar taǵy bir kabınet usynyldy. Munda kez kelgen adam demeýge muqtaj turǵyndar úshin materıaldyq kómek jetkize alady.
- Meıirimdiler klýbynyń 30 shaqty belsendisi bar, kómek qajet adamǵa qolushyn berýge nıetti óńirdiń árbir besinshi turǵynyn «passıvti» erikti dep aıtýǵa bolady. Bul kabınet biz úshin úlken qoldaý. Budan bólek, bizdiń aınalamyzda adamdarǵa paıdasyn tıgizetin jandar bolady, - deıdi erikti Olesıa Behter.
Azamattyq úıdiń ashylýynda Pavlodar oblysynyń ákimi Bolat Baqaýovqa jyldyń basynda tusaýy kesilgen «Asyq Party» jobasy tanystyryldy. Sonyń arqasynda asyq oıynyna shamamen qaladaǵy 30 balabaqsha qosylǵan.
Aımaq basshysyna qazaq tilin oqytýdyń jańa ádistemesi men Geografııa úıine álemniń ártúrli jerinen jetkizilgen biregeı eksponattar kórsetildi.
- Munda san alýan oılar men oıyndar bar. Kez kelgen kabınette jańa jobalar tanystyrylady. Bizdiń oblysty sizdermen birge jaqsarta túsemiz, -dedi Bolat Baqaýov.
Aıta keteıik, Pavlodar oblysynda barlyǵy 700-nan astam ÚEU tirkelgen.
