Pavlodarda Aımaýytov teatry 36-shy maýsymyn qorytyndylady
PAVLODAR. KAZINFORM – J. Aımaýytov atyndaǵy Pavlodar oblystyq qazaq mýzyka-drama teatry 36-shy maýsymdy qorytyndylady. Kórermenge bıyl erekshe áser syılaǵan premera - «Bir dosyń kereń eken» qoıylymyn sahnalandy.
«Bir dosyń kerek eken» komedııasy osetın dramatýrgi Georgıı Hýgaevtyń shyǵarmasy. Qoıýshy rejısseri – Jangeldi Sadyqov. Shyǵarmany aýdarǵan – Muqanǵalı Tomanov, sýretshi – Aısulý Sharıpova.
Komedııalyq qoıylym taǵdyr taýqymeti aralaryna syna qaqqanmen syn saǵatta bir-birin satpaǵan eki dostyń qyzyqty da shytyrman oqıǵasy jaıynda órbıdi. Andro men Sandro esimdi dostar, ári kórshi birin-biri keıde jek kórse de, jaýǵa bermes, qatty ókpelese de, ólimge qımas jandar retinde beınelenedi.
Óner ujymy úshin teatrdyń 36-shy maýsymy tabysty órildi deýge bolady. Ótken jyldyń qyrkúıek aıynda teatrdyń uıymdastyrýymen Alash qaıratkeri J.Aımaýytovtyń 135 jyldyǵyna oraı «Ertis-Baıan» I respýblıkalyq teatrlar festıvali ótti. Oǵan alǵashqy irikteýden ótken elimizdiń 11 teatry qatysyp, jergilikti kórermendi túrli janrdaǵy qoıylymdarǵa qaryq qyldy.
Óner ujymy odan soń Shyǵys Qazaqstan oblysynda kórnekti jazýshy, balalar ádebıetiniń klassıgi Berdibek Soqpaqbaevtyń 100 jyldyǵyna arnalǵan Qazaqstan drama teatrlarynyń HHH festıvaline «Meniń atym Qoja» qoıylymymen qatysyp, arnaıy júldeni qanjyǵaǵa basty.
Al 2024 jyl qorytyndysynda «Qazaqstan teatr synshylary birlestiginiń» synshylar júldesinde birneshe nomınatsııamen marapattaldy.
Atalǵan maýsymda teatr sahnasynda «Djýdıt jasaǵan qıyn tańdaý», «Bir dosyń kerek eken», «Peri Qatyn» jáne «Ý-sana» (ertegi) premeralyq qoıylymdary ótti.
Eske sala keteıik, londondyq rejısser Pavlodar teatrynda Brehtiń «Peri qatyn» dramasyn sahnalady.