Pavlodarda áıelder dárethanasyn ańdyp júrgen er adam pedofıl degen kúdikke ilikti
PAVLODAR. QazAqparat – Polıtsııa saýda úıleriniń satýshylarynyń shaǵymy boıynsha sotqa deıingi tergep-tekserýdi bastady, dep habarlaıdy QazAqparat tilshisi.
«Myna adamnyń eki sýretine de muqııat qarańyzdar. Ol keshe, 2019 jylǵy 12 qazanda «Manaqbaı» saýda úıindegi áıelder dárethanasyna jasyrynyp, aına men uıaly telefon arqyly áıelder men qyzdardy ańdyp júrdi. Qara kıim kıgen ony Sátbaev kóshesindegi «Sıtı Tsentrdiń» (Pavlodardaǵy saýda úıi – QazAqparat) jumysshylary sýretke túsirip alǵan. Sol jerde de áıelder dárethanasyn ańdyǵan. Keıin onyń TsÝM-daǵy áıelder dárethanasynda da júrgeni anyqtaldy. Jaqyn arada kórgenderden nemese endi kórse, polıtsııaǵa habarlaýyn ne bolmasa kúzet qyzmetkerlerimen birge ustaýyn ótinemiz», - dep málimdedi balalar oıynshyqtaryn satatyn dúkenderdiń biri Instagram paraqshasynda.
Satýshylardyń aıtýynsha, er adamnyń avtomobıli de bolýy múmkin, óıtkeni satýshylar onyń rýlge otyrǵanyn kórgen.
«Onyń bostandyqta júrgeni óte qaýipti. Janashyr jandardan ony izdep tabýǵa kómektesýdi suraımyz. Onyń erekshe belgileri: boıy shamamen 175-180 santımetr. Túri – azıat, metıske kelińkireıdi; kóziniń qıyǵy qarapaıym, dene bitimi ortasha, qarny shyǵyńqyraǵan; syrttaı qaraǵanda kúdik týdyrmaıdy, óıtkeni taza, táýir kıingen», - deıdi satýshylar.
Polıtsııa osy jaǵdaı boıynsha QR Qylmystyq kodeksiniń 124-babyna sáıkes sotqa deıingi tergep-tekserý júrgizip jatqanyn málimdedi.
«Qazir osy derekke qatysy bar tulǵany anyqtaý jáne ustaý boıynsha jedel izdestirý sharasy júrgizilip jatyr», - dep málimdedi Pavlodar oblysy polıtsııa departamentiniń baspasóz qyzmeti.
Avtory: Anton Gagarın
