Pavlodarda áıeldi óltirip, denesin órtegen er adamǵa sot úkimi shyqty
ASTANA. KAZINFORM — Pavlodar oblysynda áıeldi óltirip, qylmys izin jasyrý úshin onyń denesin órtegen er adamǵa 10 jylǵa bas bostandyǵynan aıyrý jazasy taǵaıyndaldy. Bul týraly Pavlodar oblysynyń qylmystyq ister jónindegi mamandandyrylǵan aýdanaralyq soty habarlady.
Sot materıaldaryna sáıkes, oqıǵa 2026 jylǵy 17 sáýirde Aqsý qalasynyń shetinde bolǵan. Sol kúni saǵat 18:00 shamasynda sottalýshy men jábirlenýshi jylý trassasynyń mańyna baryp, birge alkogoldik ishimdik ishken.
Іshimdik ishý kezinde áıel sottalýshynyń qaıtys bolǵan anasyn balaǵattaǵan. Osydan keıin ekeýiniń arasynda janjal týyndaǵan. Ashýǵa býlyqqan er adam áıelge kúsh qoldanyp, onyń ómirine qaýipti jaraqattar salǵan. Áıel oqıǵa ornynda jedel qan joǵaltýdan qaıtys bolǵan.
Sot málimetinshe, áıeldiń qaıtys bolǵanyna kóz jetkizgen soń, er adam úıine baryp, dızel otynyn alyp kelgen. Keıin qylmys izin jasyrý maqsatynda marqumnyń kıimderin sheship, denesin órtep, oqıǵa ornynan ketken.
Sot qandaı jaza taǵaıyndady?
Sot sottalýshyny Qazaqstan Respýblıkasy Qylmystyq kodeksiniń 99-babynyń 1-bóligi boıynsha, ıaǵnı adam óltirgeni úshin kináli dep tanydy.
— Oǵan ortasha qaýipsizdik mekemesinde jazasyn óteýmen 10 jylǵa bas bostandyǵynan aıyrý jazasy taǵaıyndaldy. Sonymen qatar jábirlenýshi taraptyń azamattyq talaby 5,5 mıllıon teńgeden astam somaǵa qanaǵattandyryldy. Úkim ázirge zańdy kúshine engen joq, — delingen habarlamada.
Buǵan deıin Pavlodarda kishkentaı qyzǵa zorlyq kórsetken pedofıl 20 jylǵa sottalǵanyn jazǵanbyz.
