Pavlodarda áıel men eki balasynyń terezeden qulaýy boıynsha qylmystyq is qozǵaldy

ASTANA. KAZINFORM — Pavlodar oblysynyń polıtsııa departamenti áıeldiń eki balasymen birge 4 pen 5-qabattardyń aralyǵynda ornalasqan páter terezesinen qulaǵanyn habarlady.

Olar podezdiń kireberisindegi shaǵyn shatyrshaǵa qulaǵan kórinedi, keıin aýrýhanaǵa jetkizildi. Qazirgi tańda bul oqıǵaǵa qatysty adam óltirýge jáne óz-ózine qol jumsaýǵa oqtalý faktisi boıynsha qylmystyq is qozǵalyp, tergeý jumystary bastaldy.

— Aldyn ala berilgen málimetterge sáıkes, áıel arnaıy medıtsınalyq esepte turǵan. Oqıǵa ornynda jedel tergeý toby jumys istep jatyr, — dep habarlady Pavlodar oblysy polıtsııa departamenti.

Pavlodar oblystyq balalar aýrýhanasy 2024 jáne 2017 jyldary týǵan eki bala qabyldanǵanyn málim etti.

— 2024 jyly týǵan bala klınıkalyq ólim jaǵdaıynda jetkizildi. Qabyldaý bólimshesinde reanımatsııalyq sharalar júrgizildi. Qazirgi ýaqytta jansaqtaý bóliminde jatyr. Onyń jaǵdaıy óte aýyr, travmatıkalyq shoktyń 3-dárejesi, bas súıeginiń keń taraǵan jaraqaty, bas súıeginiń tóbesiniń kóp jerinen jaraqat alýy, mıdyń soqqyly jaraqaty, ishki aǵzalardyń soqqydan zaqymdanýy anyqtaldy, — dep habarlady aýrýhana baspasóz qyzmeti.

2017 jyly týǵan balada bas súıeginiń jabyq jaraqaty, mı shaıqalýy, jambas súıekteriniń synýy jáne ishki aǵzalardyń zaqymdanýy bar. Onyń da jaǵdaıy aýyr, jansaqtaý bóliminde jatyr.

Zardap shekken áıel birinshi qalalyq aýrýhanada emdelip jatqany belgili boldy. Oǵan aıaq-qoldarynyń synýy dıagnozy qoıyldy. Áıel ein biledi, jansaqtaý bóliminde jatyr.

Eske sala ketsek, búgin saǵat 13:00–de medıtsına qyzmetkerlerine áıeldiń eki balasyn terezeden laqtyryp, sodan keıin ózi 5-qabattan sekirgeni týraly habar túsken edi.