Pavlodarda áıel mas kúıinde tórt balasyn otyrǵyzyp alyp kólik júrgizgen
PAVLODAR. QazAqparat – Júrgizýshi áıel jeti jylǵa kólik júrgizý quqyǵynan aıyryldy, dep habarlaıdy QazAqparat tilshisi.
«Túngi saǵat úshte Pavlodar qalasynyń Novosibir kóshesinde patrýldik polıtsııa VAZ-2107 markaly kólikti toqtatty. Medıtsınalyq saraptama qorytyndysy boıynsha, kólikti júrgizgen 30 jastaǵy áıel ishimdikke mas bolǵan. Ol 10, 7, 3 jáne bir jasar tórt balasyn birge alyp júrgen», - dep habarlady Pavlodar oblysy polıtsııa departamentiniń baspasóz qyzmetinen.
Polıtsııa áıelge qatysty QR Ákimshilik quqyq buzýshylyq týraly kodekstiń «Júrgizýshiniń kólik quralyn alkogoldik, esirtkilik jáne (nemese) toksıkomandyq mas kúıinde júrgizý» babynyń birinshi bólimi boıynsha ákimshilik hattama toltyryldy. Materıaldy mamandandyrylǵan ákimshilik sot qarastyryp, áıeldi jeti jyl kólik júrgizý quqyǵynan aıyrdy.
Sondaı-aq, áıel QR ÁQBK 590-babynyń ekinshi bólimimen kólikti memlekettik tirkeý nómirinsiz júrgizgeni úshin ákimshilik jaýapkershilikke tartyldy. Oǵan 10 AEK kóleminde aıyppul salyndy», - delingen habarlamada.
Úsh bala óńirlik qıyn jaǵdaıda qalǵan balalardy qoldaý ortalyǵyna jetkizildi, al bir jasar bala oblystyq balalar aýrýhanasynda qaralǵan soń sábıler úıine jiberildi.
Kámelettik jasqa jetpegenderdi tárbıeleý boıynsha mindetterin tıisti atqarmaǵany úshin qala turǵynyna qatysty QR ÁQBK 127-baby boıynsha ákimshilik óndiris qozǵaldy. Materıal sotqa jiberildi.
«Jyl basynan beri polıtsııa mas kúıinde kólik aıdaǵan 235 júrgizýshini ustady», - dep habarlady vedomstvodan.
