Pavlodarda aıazda jolda qalǵan avtobýstan 35 jolaýshy qutqaryldy

PAVLODAR. KAZINFORM — 21 jeltoqsan kúni Astana-Pavlodar baǵytyndaǵy avtobanda ishinde otyzdan astam jolaýshysy bar avtobýs isten shyǵyp, aıazda turyp qalǵan. Kólikte vahtalyq jumysqa jiberilgen azamattar bolǵan. Olardyń barlyǵy jylytý pýnktine ornalastyryldy.

— 112 operatoryna «Astana — Shiderti — Pavlodar — Ýspenka — Reseı Federatsııasynyń shekarasy» avtojolynda, Shiderti kentinen 5 shaqyrym jerde avtobýstyń toqtap qalǵany týraly habarlama kelip tústi. Oblystyq tótenshe jaǵdaılar departamentiniń qyzmetkerleri atalǵan jerge jedel jetti. Barlyq 35 jolaýshy evakýatsııalanyp, Shiderti kentindegi jylytý pýnktine jetkizildi. Zardap shekkender joq, medıtsınalyq kómek qajet bolmady, — dep habarlady óńirlik tótenshe jaǵdaılar departamentinen.

Anyqtalǵandaı, kóliktiń janarmaı berý júıesi isten shyqqan. Avtobýsta vahtalyq jumysqa jiberilgen 35 otandasymyz bolǵan. 

Departament ókilderi avtobýs jóndelip, jolaýshylar óz baǵyttary boıynsha jolǵa shyqqanyn habarlady.

Buǵan deıin Pavlodarda aýyl turǵyny aıazda qalyp qoıǵan qos aqqýdy qutqarǵany týraly jazǵanbyz.