Pavlodarda avtovokzalda KVI-ge qarsy vaktsına egile bastaıdy
PAVLODAr. Qazaqparat - Pavlodarda erteńnen bastap avtovokzalda KVI-ge qarsy vaktsına ege bastaıdy. Bul týraly onlaın ótken baspasóz jıynynda oblystyq densaýlyq saqtaý basqarmasynyń basshysy Aıdar Seıitqazınov málim etti, dep habarlaıdy Pavlodarnews.kz tilshisi.
- Erteń 27 sáýirden bastap avtovokzal men temir jol vokzalynyń arasynda jyljymaly medıtsınalyq keshen qoıylady. Vaktsına alǵysy keletin adamdar sol jerge shaqyrylady. Keıbir egiletin adamdary kóp aýrýhanalardaǵy patsıentter sol jerge jiberiledi. Egilý úshin azamattardyń jeke kýáligi bolýy tıis. Keshende aldymen terapevt dáriger tekseretin bolady, sodan keıin vaktsına alýǵa jiberiledi, - dedi Aıdar Seıitqazınov.
Basqarma basshysy atalǵan orynda reseılik jáne qazaqstandyq vaktsına bolǵan jaǵdaıda qaısysy egiletinin azamattar óz erikterimen tańdaıtynyn atap ótti.
- Ázirge ol jerge jyljymaly medıtsınalyq kesheni bar Pavlodar aýdanynyń aýrýhanasy bekitildi. Solar ekpe jasaıtyn bolady. Olarǵa KVI-ge qarsy qandaı vaktsına bólinse, sonymen egedi. Eger eki vaktsına da bolsa, árıne, turǵyndarǵa tańdaý jasaýǵa múmkindik beriledi, - dedi Aıdar Seıitqazınov.
Aıta keteıik, qazirgi ýaqytta Pavlodar oblysy halqynyń 5,9 paıyzy koronavırýsqa qarsy vaktsına alǵan. Oblysta arnaıy oryndarǵa baryp vaktsına egetin 37 top bar.
