Pavlodarda avtobýs qozǵalysyna kedergi keltirgen oqıǵaǵa baılanysty tekserý bastaldy

Aıta keteıik, keshe, 27 qazan kúni saparjaıda Pavlodardan Qaraǵandyǵa shyqqan avtobýstyń jolyn ózge tasymaldaýshynyń kóligi bógegen bolatyn. Osyǵan baılanysty Dıana Muhanova basqarma basshylyǵynyń tapsyrmasy boıynsha oqıǵa ornyna baryp, mán-jaıdy kózimen kórip, anyqtaǵan. - Bizde Pavlodar - Qaraǵandy baǵyty boıynsha resmı tasymaldaýshymyz bar, - dedi Dıana Muhanova. – Ol – «Balatabaev» JK. Tasymaldaýshy temir jol vokzalynyń janyndaǵy «Saparjaı Pavlodar» JShS-men kelisimshartqa otyrǵan. Al keshe, «Avtovokzal servıs» saparjaıynan «Pavlodar Interbus» JShS-ge tıesili avtobýs jolǵa shyqty. Atalǵan uıym ruqsat qaǵazy bolmaǵanyna qaramastan, resmı tasymaldaýyshynyń baǵytymen jolaýshylardy tasymaldaǵan. Sondyqtan «Baltabaev» JK resmı tasymaldaýshy retinde ruqsaty joq tasymaldaýshynyń avtobýsyn toqtatqan. «Avtovokzal servıs» JShS-niń aqparaty boıynsha, avtobýs qosymsha reıs retinde shyǵarylǵan. Zań jáne jolaýshylar men júkti tasymaldaý erejesi boıynsha qosymsha reıs negizgi reıstegi avtobýs tolyq ketip, kassadaǵy kezekte 15 adam turǵan kezde ǵana shyǵarylady. Alaıda negizgi ýaqyttan keıin shyǵarylýy qajet. Sondaı-aq jol paraqshasynda qosymsha reıs júretini týraly jazylýy tıis. Keshe polıtsııa qyzmetkerleri teksergen kezde qosymsha reıs týraly jazylmaǵan bolyp shyqty jáne avtobýs negizgi ýaqytta shyǵarylǵan.

Dıana Muhanova «Baltabaev» JK áreketi durys bolmaǵanyn jáne polıtsııa oǵan qatysty tıisti shara qoldanǵanyn atap ótti. - «Balatabaev» JK áreketi durys bolmaǵany anyq, - dedi Dıana Muhanova. – Keshe №3 avtobýs parkiniń qyzmet kórsetý kúni bolatyn. Zańǵa sáıkes tasymaldaýshy qyzmet kórsetýden bas tartsa nemese qyzmet kórsete almasa, onda kelesi ruqsaty bar tasymaldaýshy qyzmet kórsetýi tıis. ıAǵnı, keshe avtobýs jolǵa shyǵýǵa jaramasa, «Baltabaev» JK qyzmet kórsetýi tıis edi. Búginde Pavlodar-Qaraǵandy boıynsha eki baǵytta avtobýs júredi. Biri – Pavlodar-Molodejnyı-Qaraǵandy, ekinshisi – Pavlodar-Baıanaýyl-Qaraǵandy baǵyttary arqyly. Eki baǵytta da «Baltabaev» JK qyzmet kórsetedi. - Qalǵan tasymaldaýshylarda ruqsat qaǵazy joq, - dedi Dıana Muhanova. – «Baltabaev» jeke kásipkerliginen oryn alyp jatqan jaǵdaıǵa qatysty osy aıdyń 23-i kúni shaǵym tústi. Biz jaýapty organǵa jaǵdaıdy tekserip, tıisti shara qoldaný týraly suranys jiberdik. Búginde quzyrly organdarmen tekserý júrýde. Nátıjesi keıin habarlanady. Jalpy, keıin mundaı jaǵdaı qaıtalanbas úshin keshendi jumys atqarylatyn bolady.

Basqarma ókiliniń aıtýynsha, jolaýshylar tasymaly naryǵynda «Pavlodar Interbus» JShS-ne qarsy eshqandaı áreket jasalyp jatqan joq. - Bizde barlyq tasymaldaýshylar - jeke uıymdar, - dedi Dıana Muhanova. – Oblys ishindegi jáne oblysaralyq baǵyttarǵa konkýrstyq sharalar ótkennen keıin ǵana qyzmet kórsetiledi. Saparjaı jelige tasymaldaýshylardy jiberý úshin uıymnyń baǵytta qyzmet kórsetýge ruqsat qaǵazy bolý kerek. «Pavlodar Interbus» JShS konkýrstarǵa qatysty. Jeńilgennen keıin sotqa shaǵymdandy. Sot bizdiń áreketimiz zańdy ekeni týraly sheshim shyǵardy. Bizde komıssııalyq otyrys ótetin kezde atalǵan tasymaldaýshy qujattaryn ózi alyp ketken jaǵdaılar boldy. Sondyqtan tasymaldaý naryǵynda bul uıymǵa qarsy áreket jasalyp jatqany týraly aqparat jalǵan.