Pavlodarda aýyl turǵyny adasyp qalǵan bulandy qutqardy
PAVLODAR. QazAqparat - Pavlodar oblysynyń Baıanaýyl aýdanynda adasyp qalǵan bulandy aýyl turǵyny qutqaryp qaldy, dep habarlaıdy QazAqparat.
«Tańerteń erte kúndelikti ádet boıynsha óristegi maldy qarap shyǵýǵa bardym. Bir sıyr bólek turǵan sekildi kórindi. Tabynǵa qosaıyn dep jaqynyraq barsam urǵashy bulan eken. Ol óte júdep ketken, qashqaqtap turdy», - deıdi Baıanaýly aýdany Toraıǵyr aýylynyń turǵyny Qýanysh Jámıev.
Qýanyshtyń aıtýynsha, ol bulandy óristen tapqan. Ony sıyrǵa qosyp sharýa qojalyǵynda qaldyryp, birden ormanshylyqqa telefon shalyp oqıǵany habarlaıdy.
«Biz habardy tańerteń saǵat toǵyzda aldyq ta dereý sharýa qojalyǵyna attandyq. Bul bulannyń analyǵy. Jasy shamamen eki nemese eki jarymda. Bylaı qaraǵanda esh jaraqaty joq», - deıdi Baıanaýyl memlekettik ulttyq parki Jasybaı bólimshesiniń jetekshisi Qýanbek Mádın.
Qýanbektiń aıtýynsha, bulan bir orynda turaqtamaı aýyp kete beretin, alaıda jalǵyz-jarym júrmeıtin janýar. Sondyqtan bulanǵa birdeńe bolǵan. Orman qorǵaýshylarynyń boljamynsha ol bireýlerden qashqan, shamasy ańshylar bolýy múmkin.
Bulandy ormanǵa qaıtarý úshin Baıanaýyl parkiniń qyzmetkerleri qutqarý operatsııasyna kiristi. Úsh mototsıkl, Nıva kóligimen janýarld ormanǵa sheıin aıdap ákeldi. Olarǵa Qýanysh Jámıev pen onyń uly Elaman járdem berdi.
«Eger bulan dalaly jerde qalsa, mynadaı júdeý-jadaý kúıinde ólip qalýy múmkin edi», - deıdi Qýanbek Mádın.
Avtor: Anton Gagarın
