Pavlodarda aýyl sharýashylyǵy salasynda qandaı problemalar sheshimin tappaı otyr
Oblystyń kókónis qoımasy – Chernoıarsk aýyldyq okrýginde pııaz, kartop, qyryqqabat egilip, sábiz otyrǵyzý naýqany jalǵasyp jatyr.
Pavlodar aýdanyna barǵan aımaq basshysy Ábilqaıyr Sqaqov sharýa qojalyqtarynyń jospary jóninde bilip qaıtty.
Pavlodar oblysynyń ákimi jumys saparyn Novochernoıarka aýylynan bastady.
Ótken jyly munda uzaq jyldar boıy ıesiz qalǵan kópqabatty úıler qalpyna keltirilip, olarǵa ınjenerlik jeliler tartylǵan.
Qazir «Aýyl – el besigi» baǵdarlamasyna sáıkes eldi mekende jol jáne áleýmettik ınfraqurylym jaqsartylyp jatyr.
Búginde aýyldyq mádenıet úıinde jóndeý jumystary júrip jatyr.
- Novochernoıarkada kósheler jóndelip, bıyl biz basketbol men voleıbolǵa arnalǵan oıyn alańyn ornatýdy josparlap otyrmyz, - dedi Pavlodar aýdanynyń ákimi Janat Shuǵaev. - Sonymen qatar, bizdiń aýylsharýashylyq taýar óndirýshilerimizdiń arqasynda munda balalar alańyn jabdyqtaý nıetimiz bar.
Jergilikti kókónis ósirýshiler búgin qyzý naýqanyn ótkizip jatyr. Olar pııaz, kartop, qyryqqabat egip, qazir sábiz otyrǵyzý jumystaryn jalǵastyryp jatyr.
Agrarshylar moıyndaǵandaı, olar jańbyrdy asyǵa kútip júr.
Alaıda, jaýyn-shashynǵa táýeldi bolmas úshin fermerler qunynyń 50%-na deıin memleket sýbsıdııalaıtyn sýarý jabdyqtaryn satyp aldy.
Olar aımaq basshysynyń aldynda arzan janarmaıdyń utymdy bóliný máselesin kóterdi: erejege sáıkes jaǵarmaı kólemi egis kólemine qaraı bólinýi tıis bolsa da, usaq sharýa qojalyqtary 1–2 tonnadaı ǵana otyn alady.
- Bul istiń álegi kóp, sondyqtan kóptegen adamdar arzan janarmaıdan bas tartyp otyr, - deıdi «Rodnık» sharýa qojalyǵynyń jetekshisi Gennadıı Andreıtsev. - Máselen, biz bir gektarǵa 53 kılogramǵa jýyq qyryqqabat ósiremiz. Osy ónimdi ósirý úshin gektaryna alatyn 60 lıtr dızel biz úshin jetkiliksiz, óıtkeni biz únemi kóshetimizdi sýaryp, óńdep otyrýymyz kerek.
«Eldar» sharýa qojalyǵynda Ábilqaıyr Sqaqovqa mehanızatorlardyń jetispeýshiligi máselesi aıtyldy.
Ákim osy máseleni sheshý úshin belsendi jumys júrip jatqanyna sendire otyryp, sonymen birge bul problema agrarıılerdiń bastamashyldyǵyna da baılanysty ekendigin aıtty.
- Adamı kapıtalsyz damý joq, - dedi aımaq basshysy. - Fermerler bizdiń aýyl sharýashylyǵyna mamandar daıarlaıtyn kolledjdermen baılanysta bolyp, olarmen kelisimshart jasasýy kerek. Jastarmen kásiptik baǵdar berý jumysy ekinshi nemese úshinshi kýrstan bastap júrgizilýi tıis.
Sondaı-aq, oblys ákimi 300 tonnaǵa jýyq ónim óndirgen «Turkey PVL» JShS qus fabrıkasyna bardy.
Búgingi kúni bes jańa qus kúrkesin ornatý jáne taza et óndirisiniń kólemin táýligine 10 tonnaǵa deıin jetkizý josparlanyp otyr.
- Búgin biz Nur-Sultan qalasy men Qaraǵandy oblysynda jumys istep, Batys Qazaqstan men Reseıdiń naryǵyna shyǵyp jatyrmyz, - dep atap ótti kompanııa dırektory Erbol Dosybaev. - Biz kúrketaýyq etinen jartylaı fabrıkattar shyǵaraıyq dep jatyrmyz. Ol úshin biz nemis kompanııasymen kelissózder júrgizip, qajetti jabdyqty tańdap jatyrmyz.
Novoıamyshevo aýylynyń mańynda taǵy bir iri joba iske asyryla bastady – munda kóptegen jyldar boıy paıdalanylmaǵan 1,6 myń ga alqapta sýarý jumystary qaıta jańǵyrtylýda.
Bıylǵy jazdyń ózinde «Agro-Treıd PV» JShS 600 gektarǵa jýyq jerdi sýlandyryp, kartop, jemdik júgeri men jońyshqa ósire bastamaq.
Bolashaqta munda 1,2 myń bas iri qara malǵa arnalǵan sút fermasy da josparlanǵan.
- Qazir biz óz esebimizden jumys istep kelemiz, - dedi kásiporyn basshysy Qýanysh Temirǵalın. – Biz daıyndaǵan jobalyq-smetalyq qujattama saraptamadan ótip, «Báıterek» holdınginde maquldandy. Eger biz jobany qarjylandyrý úderisin jedeldete alsaq, sút fermasyn kelesi jyly paıdalanýǵa berýge daıynbyz. Bul naqty sózimiz.
Ábilqaıyr Sqaqov jobaǵa qoldaý kórsetiletinin jetkizip, sýarý jáne sút-et óndiristerin damytýǵa baǵyttalǵan keshendi jobalarynyń árdaıym quptalatynyn atap ótti.
