Pavlodarda aýyl turǵyny óz qyzyn zorlaǵany úshin 16 jylǵa sottaldy
PAVLODAR. KAZINFORM — Jábirlenýshi qyzdyń anasynyń aıtýynsha, er adam ony demalys kúnderi óz úıine alyp ketip, qııanat jasaǵan. Sotta er adamnyń qyzdyń ákesi ekenin rastaıtyn qujattyq dáleldemeler anyqtalmaǵan.
Zorlaý oqıǵasy boıynsha is materıaldary Pavlodar oblysynyń qylmystyq ister jónindegi mamandandyrylǵan aýdanaralyq sotynda qaraldy. Jábirlenýshiniń anasy aıyptalýshymen 2018 jyly ajyrasqan. Oǵan deıin álgi er adamnan qyz bala týǵan. Biraq resmı nekede bolmaǵandyqtan, týý týraly kýáliktegi «ákesi» degen baǵan bos qalǵan.
40 jastaǵy er adam qyzyna mezgil saıyn kelip, keıde mektepke kıim-keshek pen keńse taýarlaryn alýǵa kómektesken. Týǵan kúnine, Jańa jyl merekesinde syılyqtar ákelip júrgen. Áıel qyzynyń ákesimen aralasýyna kedergi jasamaǵan.
Іs materıaldarynda aıtylǵandaı, 2025 jyldyń qyrkúıeginde er adam qyzyn demalys kúnderine kórshi aýyldaǵy úıine alyp ketedi. Zorlaý oqıǵasy da sol mezette bolǵan. Qyz jeksenbi kúni anasyna oralyp, bolǵan jaǵdaıdy baıandaǵan. Al áıel birden polıtsııaǵa habarlaǵan.
— Taǵaıyndalǵan saraptamalar er adamnyń kinásin dáleldedi. Qylmystyq is sotqa «ata-anasynyń kámeletke tolmaǵan balasyn zorlaýy» deregi boıynsha túsken edi. Alaıda sot otyrystary barysynda ákelikti rastaıtyn qujattyq dálelderdiń joqtyǵy anyqtalyp, soǵan baılanysty sot bapty ózgertýge májbúr boldy. Qylmystyq kodekstiń 120-baby 3-1-bóligi 1-tarmaǵynda kózdelgen qylmysty jasaǵany úshin er adam kináli dep tanylyp, oǵan 16 jyl merzimge bas bostandyǵynan aıyrý jazasy taǵaıyndaldy, — dep habarlady Pavlodar oblysynyń qylmystyq ister jónindegi mamandandyrylǵan aýdanaralyq sotynan.
Sondaı-aq, er adamǵa pedagogıkalyq laýazymdardy atqarýǵa, balalarmen baılanysty jumys isteýge ómir boıyna tyıym salyndy. Úkim zańdy kúshine engen joq.
Eske sala keteıik, Aqtóbede oqýshy qyzǵa seksýaldyq zorlyq kórsetti degen kúdikpen er adam ustaldy.
