Pavlodarda aýyl turǵyny aıazda qalyp qoıǵan qos aqqýdy qutqardy
PAVLODAR. KAZINFORM — Aqqýlardyń biri muzǵa jabysyp qalyp, syńary janynda qalyp qoıǵan. Qustardyń ábden álsiregeni baıqalady.
Pavlodar óńiriniń turǵyny Baýyrjan Jaqypov jyly jaqqa usha almaı qalǵan qos aqqýdy qutqaryp, úıinde qystatyp jatyr. Olardy syqyrlaǵan sary aıazda kóldegi muz ústinen taýyp alǵan.
— Aqqýdyń analyq syńary muzǵa jabysyp qalyp, atalyq aqqý sony kútip jyly jaqqa ushyp ketpeı, qasynda qalǵan. Ábden jaýrap, álsiregen. Aıazda úıge alyp keldik, - deıdi aýyl turǵyny Baýyrjan Jaqypov.
Vıdeodan baıqalǵandaı, jyly úıge kirgen aqqýlar, qalǵyp-múlgip án tyńdap otyr.
Ánshiligi bar, túrli aspapta oınaıtyn ónerli azamat mal sharýashylyǵymen aınalysady.
— Baıanaýyl aýdanyna qarasty Birlik aýyldyq aýmaǵynda turamyn. Aqqýlardy Sulýsor degen kólden qutqardyq. Qazir jaǵdaılary jaqsy, túrli dándermen qorektenedi. Jaqyn kúnderi oblys ortalyǵyna aparyp, qustardy qaraıtyn klınıkaǵa kórsetip almaqpyn. Olardy bıyl qysta ózimizde qaldyramyz dep sheshtik. Qystaqta ekinshi úı bos tur, sony jylytyp, qustardy sonda ustaımyz, - deıdi Baýyrjan.
Buǵan deıin pavlodarlyq ormanshylar jaraqattanyp qalǵan aqqýdy qutqarǵanyn jazǵan edik.