Pavlodarda aýyl turǵyndaryna 12 myń gektarǵa jýyq jaıylym qaıtaryp berildi

PAVLODAR. KAZINFORM - Bıyl óńir boıynsha  140 myń gektar paıdalanylmaıtyn jerlerdi qaıtarý josparlanǵan. Onyń teń jartysy búginde memleket menshigine alyndy.

Pavlodar oblysynda jyl basynan memleket menshigine 70,7 myń gektar jer qaıtarylǵan. Onyń ishinde 20,5 myń gektar jaldaý merziminiń aıaqtalýyna baılanysty, 42,2 myń gektar erikti bas tartý, 4,4 myń gektar májbúrlep alyp qoıý, 3,5 myń gektar ózge sebeptermen qaıtaryldy. Sonyń ishinde 18 myń gektar aınalymǵa qaıta taratyldy.

«Qaıta taratylǵan jerlerdiń ishinde 11,9 myń gektary aýyl turǵyndarynyń muqtajdyǵy úshin, ıaǵnı jaıylym úshin paıdalanýǵa berildi. Biz aýyl jurtshylyǵyna eldi mekenderge jaqyn jaıylymdardy ǵana usynamyz. Aýyl aınalasynda 40-70 shaqyrym jerde ornalasqan jaıylymdar bizde jetkilikti. Mal órisiniń jetispeýshiligi jaıylymǵa kóp sıyr shyǵaratyn aýyldar mańynda ǵana baıqalady», - deıdi Pavlodar oblysy Jer qatynastary basqarmasynyń basshysy Murat Hamıtov.

Qazaqstan ǵarysh sapary ulttyq kompanııasynyń ǵaryshtyq monıtorınginiń nátıjelerine súıensek, Pavlodar oblysynda paıdalanylmaıtyn jerdiń jalpy aýdany – 502,3 myń gektar. Olardyń ishinde 482,2 myń gektar jerde mal múlde jaıylmaıdy. Al 20,1 myń gektar aýmaqta óriske shyqqan úı janýarlarynyń sany tym az ekeni baıqalǵan.