Pavlodarda aýyl turǵyndary janyp jatqan úıden qos qarııany qutqardy

PAVLODAR. KAZINFORM - Zardap shekken erli-zaıyptylar túrli dárejedegi kúıikpen Aqsý qalasyndaǵy aýrýhanaǵa jatqyzylǵan.

Aqsý qalasyna qarasty Evgenevka aýylynda jer úı órtenip, eki adam zardap shekti.

- 11 naýryz kúni saǵat 22.04-te Evgenevka aýylynyń turǵyndary Sergeı Dýbının men Arkadıı Serkov jer úıdiń shatyrynyń órtenip jatqanyn baıqaıdy. Ýaqytty joǵaltpaı, olar shuǵyl qyzmetterge qońyraý shalyp, kómekke asyǵady. Janyp jatqan úıge kirip, egde jastaǵy úı ıelerin, 1956 jylǵy áıeldi jáne 1955 jyly týǵan er adamdy alyp shyqqan, - dep habarlady óńirlik tótenshe jaǵdaılar departamentinen.

Aýyldyń taǵy bir turǵyny Artem Stotskıı óz kóligimen zardap shekkenderdi aýrýhanaǵa jetkizgen. Qarııalar órt saldarynan qatty kúıik alyp, Aqsý qalasyndaǵy aýrýhanaǵa jatqyzylǵan. Buǵan qosa órt ornynan kólemi 50 lıtrlik eki gaz ballony shyǵarylǵan.

Oqıǵa ornynda tótenshe jaǵdaılar departamentiniń kúshteri, jergilikti atqarýshy organdardyń qyzmetkerleri, sondaı-aq erikti órtke qarsy qurylymdar jumys istedi. 100 sharshy metr alańdy sharpyǵan órt tolyqtaı 00.33-te sóndirilgen.

Eske sala keteıik, Pavlodar oblysynda jer úı órtenip, bir adam qaza tapty.