Pavlodarda aýyl sharýashylyǵyna 400-den astam maman jetispeıdi
PAVLODAR. KAZINFORM – Ertis-Baıan óńirinde aýyl sharýashylyǵy salasynda 444 mamanǵa suranys bar. Ásirese agronom, mehanızator, veterınar jáne ınjener-mehanıkterge muqtajdyq basym.
«Atameken» kásipkerler palatasynyń saýalnamasy oblystaǵy aýyl sharýashylyǵy kásiporyndaryna qajetti kadrlardyń jetkiliksiz ekenin kórsetken. Jalpy óńirdegi 614 kásiporynda jumysshy mamandarǵa suranys bar.
- Mysal úshin astyqty tereń óńdeý baǵytyndaǵy kásiporyndar kóbeıgenimen, bilikti tehnologtar men zerthanashylar tapshylyǵy saqtalyp otyr. Óńirde bıdaı qabyldaıtyn onǵa jýyq iri elevator jumys isteıdi. Munda astyqtyń sapasyn tekserip, ónimniń talapqa sáıkestigin baǵalaıtyn mamandar qajet, - dep habarlady óńirlik kásipkerler palatasynan.
Kadr tapshylyǵyn azaıtý maqsatynda oblysta dýaldy oqytý júıesine den qoıǵan. Búginde 144 kásiporyn kolledjdermen birlesip mamandar daıarlaýǵa qatysady. Sonymen qatar keıbir aýdandarda qysqa merzimdi kásiptik oqytý baǵdarlamalary arqyly qajetti kadrlardy jedel daıarlaýǵa múmkindik bar. Naryq suranysyna saı mamandardy jeke kásipkerlerdiń bazasynda oqytý da qolǵa alynǵan. Máselen, Ýspen aýdanynda omartashylardy daıarlaıtyn arnaıy ortalyq ashylǵan.
Buǵan deıin elimizde qandaı jumysshy mamandarǵa tapshylyq baryn jazǵanbyz.
