Pavlodarda aýyl ákimi veterınarııa qyzmetiniń feldsherin soqqyǵa jyqqan

PAVLODAR. KAZINFORM — Polıtsııa Qoıandy aýyldyq okrýginiń ákimi men feldsher arasyndaǵy janjal turmystyq sıpatta bolǵan, ekeýi tatýlasyp úlgerdi dep habarlady.

Áleýmettik jelide Ekibastuz qalasy Qoıandy aýyldyq okrýginiń ákimi Erjan Ýrazalımovtyń Ekibastuz qalalyq veterınarlyq stansasynyń feldsherin soqqyǵa jyqqany týraly habar tarap ketti. Jeli qoldanýshylary memlekettik laýazym ıesi zańǵa tompaq áreketi úshin jaýapkershilikke tartylýy kerek degen pikirde.

Óńirlik densaýlyq saqtaý basqarmasy baspasóz qyzmetiniń málimetinshe, zardap shekken azamat Ekibastuz qalalyq travmatologııalyq pýnktine habarlasqan.

— 27 qyrkúıek kúni travmatologııalyq pýnktke bet-álpeti soqqydan kógergen azamat kelgen. Ol ózin belgisiz bireýdiń urǵanyn jetkizgen. Dárigerler teksere kele jabyq bas mı jaraqaty, bas mıynyń shaıqalýy, bet-álpetiniń kógerýi dıagnozdaryn qoıdy. Habarlasqan adam ýdaı mas bolǵan ári statsıonarlyq emdelýden bas tartqan. Oǵan emdelý týraly aqyl-keńes berildi jáne narkolog mamanymyz áńgimelesti. Turǵylyqty mekenjaıy boıynsha emhanadaǵy travmatolog mamanǵa barý usynyldy, — dep málimdedi densaýlyq saqtaý basqarmasynan.

Al oblystyq polıtsııa departamenti ákim men feldsher arasyndaǵy janjal kásibı qyzmetke esh qatysy joq, turmystyq sıpatta bolǵan dep otyr. Eki tarap tatýlasyp úlgergen.

— Oqıǵa keshki ýaqytta, olardyń qyzmettik mindetterin atqarý kezinen tys mezgilde, saltanatty is-shara barysynda bolǵan. Jaǵdaı turmystyq sıpatta bolǵan, kásibı qyzmetke esh qatysy joq. Olar keıin ózara tatýlasyp, bir-birine eshqandaı aryz-shaǵym bildirmegen, — dep habarlady polıtsııa departamentinen.

Eske sala keteıik, Aqtóbede áıeldi uryp-soqty dep aıyptalyp jatqan qala ákimi aıyppul tóleýi múmkin.