Pavlodarda Aýǵanstan azamaty jalǵan qujattar arqyly áleýmettik tólem alyp kelgen
PAVLODAR. KAZINFORM - Pavlodar oblysynyń prokýratýrasy qandastardy kóshirý jónindegi memlekettik baǵdarlamany iske asyrý barysynda bıýdjet qarajatyn jymqyrý faktisi boıynsha qozǵalǵan qylmystyq is aıasynda múlikti tárkileý týraly sotqa deıingi óndiristi bastady.
Oblys prokýratýrasy baspasóz qyzmetiniń habarlaýynsha, tergeý barysynda Aýǵanstan Respýblıkasynyń azamaty óziniń qazaq ultyna jatatyny týraly kórineý jalǵan málimetter men qujattar usyný arqyly áleýmettik tólemderdi zańsyz alǵany anyqtaldy.
Atalǵan aqshaǵa quny 20 mln teńge bolatyn páter satyp alynǵan.
Qylmystyq jolmen alynǵan kiristerdi zańdastyrýǵa jol bermeý maqsatynda prokýratýra organdarynyń ótinishi boıynsha sot múlikti memleket kirisine tárkileý týraly sheshim qabyldady.
Sot aktisi zańdy kúshine engen joq.
- Alaıaqtyq faktisi boıynsha sotqa deıingi tergep-tekserý qylmystyq qýdalaý organy tarapynan júrgizilip jatyr, - delingen habarlamada.
Osyǵan deıin ShQO-da qos azamattyqpen júrgen 11 adam elden shyǵarylǵany týraly jazdyq.