Pavlodarda ataqty ánshi, akter Káýken Kenjetaevtyń Aqqý dombyrasy saqtalyp tur
PAVLODAR. KAZINFORM — Qazaq kınosynyń atasy Sháken Aımanovtyń týǵan inisi — Káýken Kenjetaevtyń án aıtý máneri eshkimge uqsamas ózindik boıaýmen órnektelgen. Óner ıesi óz daýysyna laıyq aqqý moıyn dombyrany tapsyryspen jasatqan kórinedi.
Pavlodar oblystyq Buqar jyraý atyndaǵy ádebıet jáne óner mýzeıinde Ertis-Baıan óńirinen shyqqan óner tarlandarynyń biregeı zattary synyn buzbaǵan kúıinde saqtalyp tur. Sonyń biri — bıyl týǵanyna 110 jyl tolyp otyrǵan Qazaq KSR halyq ártisi Káýken Kenjetaevtyń (shyn esimi Ábdirahym) aqqý pishindi dombyrasy.
Káýken Kenjetaev el esinde ánshiligimen qosa, akter, rejısser, dramatýrg retinde qaldy. Elýden astam án, romans, arııalardyń mazmunyn ózge tilden ana tilimizge aýdarǵan.
Teatr ónerinen bólek, kıno salasynda da jarqyrady. «Jerge qaıtyp oralýda» — rejısser, «Bizdiń súıikti dárigerde» — ánshi, «El basyna kún týsa» fılminde — Baýyrjan Momyshuly, «Án qanatynda» — Nurtaza, «Tulpardyń izinde» — Tanabaı, «Taýdaǵy shynarda» — Japas, «Qyzyl tas zastavasynda» — qart, «Qyz Jibekte» — Bazarbaı, «Borandy bekette» — Qazanǵap, «Gaýhartasta» — qart áke obrazdaryn somdady.
Teatr men kıno jáne ádebıet salasynda qol jetkizgen tabystary úshin Sh. Aıtmatov atyndaǵy Halyqaralyq syılyqtyń laýreaty atanǵan.
Káýken Kenjetaev negizinen shyn máninde qazaqtyń sol zamandaǵy kásibı opera ánshileriniń biri bolǵany belgili. Kýrganıskııdiń alǵashqy shákirtteriniń biri, daýysy — bas barıton. Dombyramen án shyrqaǵanda el-jurtty tamsandyryp, ánshiniń erekshe daýsy kópti baýrap alǵan.
Aqqý dombyra uzaq jyldar óner ıesiniń serigi bolyp, kóptegen kontsertterde qolynan tastamaǵan. 2008 jyly dúnıeden ótken soń Buqar jyraý mýzeıiniń qyzmetkerleri Almatyǵa arnaıy baryp, áıgili jerlesimizdiń urpaqtarynan attaı qalap alyp kelipti.
Qońyr úndi dombyranyń moıny aqqýdyń moınyna, al shanaǵy aqqýdyń qos qanatyna uqsas etip jasalǵan. Kóne zat jergilikti mýzeıdegi qundy jádigerler qatarynan oryn alǵan.
Eske salaıyq, Pavlodarda Ámire Qashaýbaevtyń daýysy jazylǵan kúıtabaq saqtalyp tur.
