Pavlodarda asyq atýdan týrnır ótti
ASTANA. QazAqparat - Pavlodarda «Rýhanı jańǵyrý» baǵdarlamasy aıasynda orta bilim beretin arnaıy mektepter arasynda asyq atýdan birinshi týrnır ótti, dep habarlaıdy QazAqparat pavlodarnews.kz saıtyna silteme jasap.
Oblystyq bilim berý basqarmasy men Innovatsııalyq Eýrazııa ýnıversıteti qoldaý kórsetken jarysty «Zhasproject» jastar korpýsyn damytý jobasynyń belsendileri uıymdastyrdy.
«Alǵash ret ótip otyrǵan týrnırge oblystaǵy arnaıy orta bilim beretin jeti mektepten komandalar keldi. Ár komandanyń bir ul, bir qyzdan turatyn eki múshesi bar. Oblystyq orta bilim beretin araıy mektep «Zhasproject» korpýsymen birlesip «Asyq atý - aqyl oıyny» atty jobany qolǵa alǵan bolatyn. Ulttyq oıynnyń tanymaldyǵyn odan ári damytý úshin týrnır uıymdastyryp otyrmyz», - dedi «Zhasproject» jastar korpýsyn damytý jobasynyń ókili, oblystyq arnaıy bilim berý mektep-ınternatynyń defektology Dınara Jetpisova.
Týrnırge arnaıy kelgen bilim basqarmasynyń ókili Azamat Syzdyqov, InEÝ-diń rektory Marat Baıandın ulttyq oıynnyń mańyzdylyǵy men paıdasyna toqtalyp, jarysqa qatysýshylarǵa sáttilik tiledi.
«Ulttyq asyq oıyn túrlerin budan bylaı úzdiksiz uıymdastyratyn bolamyz. Qalalyq bilim bólimimen kelisim jasaldy. Bul týrnır - aldaǵy úlken jarystardyń basy», - dedi Marat Baıandın.
Uldar «Bes taban», qyzdar «Bes tas» oıyny boıynsha synǵa tústi. Nátıjesinde uldar arasynda Sharbaqty № 5 arnaıy mektebiniń oqýshysy Stanıslav Anısov birinshi oryndy jeńip aldy. Ekinshi oryndy sharbaqtylyq Janbolat Elýbaı enshilese, Aqsý qalasyndaǵy № 3 arnaıy mekteptiń oqýshysy Dıas Rahymbergenov úshinshi oryndy qanaǵat tutty.
Qyzdar arasyndaǵy básekede № 4 arnaıy mektep oqýshysy Sofııa Kamınskaıa qurbylarynyń aldy boldy. Jetim jáne ata-ana qamqorlyǵynsyz qalǵan Peschan arnaıy mektep-ınternatynyń tárbıelenýshisi Darıa Manolenko - ekinshi oryn, oblystyq arnaıy mektep-ınternatynyń oqýshysy Kamılla Baıtas úshinshi oryn enshiledi.
«Asyq oıyndarynyń biraz túrlerin bilemin. Kópten beri qurby synyptastarymmen oınap júrmiz. Ulttyq oıyn aqyl-oı zerektigine, eptilikke, uqyptylyqqa úıretedi. Osy joly úshinshi orynǵa ǵana ıe boldym. Aldaǵy ótetin týrnırlerge myqtap daıyndalamyn», - deıdi oblystyq arnaıy mektep-ınternatynyń oqýshysy Kamıla Baıtas.
