Pavlodarda Astana kúnine oraı Qaraqat pen Qydyráli án shyrqady

ASTANA. QazAqpara - Keshe, 6 shilde kúni saǵat 12.00-den bastap 15.00-ge deıin ortalyq jaǵajaıda Qazaqstan estrada juldyzdary Qydyráli men Qaraqat jáne aǵaıyndy Júginisovterdiń qatysýymen Astana kúnine arnalǵan merekelik kontsert jáne «Bolashaq qýaty» teatrlandyrylǵan qoıylymy ótti, dep habarlaıdy pavlodarnews.kz .

«Astananyń salynýy tek Qazaqstan úshin emes, álem úshin de tyń serpilik ákeldi, - dedi Pavlodar oblysynyń ákimi Bolat Baqaýov.

 «Búgingi tańda dúnıe júzi tamsanǵan elordamyzda halyqaralyq «EKSPO-2017» kórmesi ótýde. Astana - álem lıderleri arasynda ekonomıkalyq jáne dıplomatııalyq dıalogtardy ótkizetin ortalyqqa aınaldy dep nyq aıtýǵa bolady. Pavlodar óńirinde aıtýly mereke qarsańynda kóptegen sharalar júzege asýda. Másele, kúni keshe Aqsý qalasyndaǵy Evgenevka aýylynda dene shynyqtyrý-saýyqtyrý alańy ashyldy. Búgin Pavlodarda 108 páterli baspana paıdalanýǵa berildi, qalamyzdaǵy jaǵajaıdyń uzyndyǵy tórt shaqyrymǵa jetti. Tamasha jaǵalaý. Árıne biz munymen toqtap qalmaımyz. Ár shańyraqqa amandyq, jemisti jumys tileımin. Mereke qutty bolsyn!»,-dedi óńir basshysy.

 Budan soń sahna tórine Qazaqstan estradasynyń juldyzdary Qaraqat pen Qydyráli shyǵyp, pavlodarlyqtarǵa ánnen shashý shashty. Sonymen qatar, ortalyq alańda qala turǵyndaryna jáne balalarǵa arnalyp «Bolshoı attraktsıon»- oıyn qalashyǵy, «Elimniń júregi - Astana!» - tilekter stendi, «Meniń Astanam!» - Astana qalasynyń maketi - Astana boıynsha kishigirim saıahat, «Jeńisim saǵan, Astana!» - sporttyq - oıyn, Art - býlvar, fotokórme, «Tebe, moıa stolıtsa, tvorchestvo darıý!» - mýzykalyq - aqyn, bard ónerleri, «Arý qala- Astana» - áýe sharlarynyń festıvali, «Týǵan kúnińmen - Astana» - merekelik tort (ár qalaǵan adam úlken tortty gúldermen bezendire alady), juldyzben fotoǵa túsý - tantamareska zonalary uıymdastyryldy.

 Aıta keteıik, jalpy, Pavlodar qalasynda 5-9 shilde kúnderi aralyǵynda Astana kúnine arnalyp 40-tan asa merekelik is-sharalar uıymdastyrylatyn bolady.