Pavlodarda Astana kúni qarsańynda 140 otbasy baspanaly boldy
Pavlodarda Saryarqa shaǵyn aýdanyndaǵy turǵyn úı paıdalanýǵa berildi. «Nurly jer» Memlekettik baǵdarlamasy aıasynda salynǵan kópqabatty turǵyn úıden páterli bolǵandar arasynda Uly Otan soǵysy ardagerleri, jetim balalar jáne kópbalaly analar da bar. Páter ıeleri aıtýly mereke qarsańynda qonys toıyn toılaý erekshe syılyq ekenin aıtady.
Aıta keterligi, jyl sońyna sheıin «Saryarqa» shaǵyn aýdanyndaǵy taǵy segiz turǵyn úıdi paıdalanýǵa tapsyrý josparda bar. Sonyń ekeýi «Alıýmınqurylys» shaǵyn aýdanynyń turǵyndary úshin salynyp jatyr, al altaýy «Turǵynúıqurylysjınaqbank» baǵdarlamalarynyń qatysýshylaryna beriledi.
Elordanyń mereıtoıy qarsańynda Aqsý qalasynda da jańa turǵyn úı paıdalanýǵa berildi. Bes qabatty turǵyn úıdi salýǵa ERG korporatsııasynyń quramyna kiretin Eýrazııa energetıka korporatsııasy tapsyrys bergen. 70 jańa páterge osy kásiporynnyń qyzmetkerleri ornalasty. Kompanııa óklderiniń aıtýynsha, páterlerdiń aýdanyn bólip berýde óte tapshy mamandyq ıelerine, jas jáne joǵary bilikti mamandarǵa basymdyq berilgen.
Aqsýda jańa úımen qatar kúrdeli jóndeýden shyqqan stadıon da paıdalanýǵa berildi. Budan bólek, qalada balalarǵa arnalǵan jańa ekotehnıka ortalyǵy da ashyldy. Qaıta túlegen ortalyqta endi ІT-kabınet, kovorkıng-ortalyq, «Jibek joly» eko- jáne etnotýrızm kabıneti bar.
Sondaı-aq Astana kúni qarsańynda eldi damytýǵa súbeli úles qosqan pavlodarlyqtardy marapattaý rásimi boldy. Prezıdenttiń Jarlyǵymen 30 adamǵa «Astana 20 jyl» mereıtoı medaldary tabys etildi.
