Pavlodarda áskerı qyzmetshiler úshin modýldik úlgidegi zamanaýı kazarmalar ashyldy
PAVLODAR. KAZINFORM - Ǵımarattar ártúrli maqsatta qoldanýǵa arnalǵan bólmelerden turady. Ár kazarma 100 sarbazǵa arnalǵan.
Bul týraly QR Ulttyq ulanynyń baspasóz qyzmeti habarlady.
Jańadan salynǵan modýldik ǵımarattar ártúrli maqsatta qoldanýǵa arnalǵan bólmelerden turady. Atap aıtqanda, modýldik kazarma kezekshi bólmelerden, demalýǵa, oq-dárilerdi, qarýdy saqtaýǵa, qarýdy tazartýǵa, jeke brondy qorǵanys jáne belsendi qorǵanys quraldaryn saqtaýǵa arnalǵan bólmelerden quralǵan. Sondaı-aq munda kezekshi bólimsheniń demalys, jatyn bólmeleri, kıim aýystyratyn, jýynatyn bólmeler, sanıtarlyq torap, dýsh bólmesi, sport zal, jattyǵý zaly, jaýyngerlik daıyndyq synyby, arnaıy daıyndyq taktıkasy synyby, aqparattyq-tárbıe synyby, kıim-keshek pen aıaq kıimdi keptirýge arnalǵan bólme, qoıma, avtotehnıkany saqtaýǵa arnalǵan bokstar bar.
«Búgin biz modýldik úlgidegi jańa kazarmalardyń ǵımarattaryn saltanatty jaǵdaıda ashtyq. Bul sarbazdarǵa degen QR Qarýly Kúshteriniń Joǵarǵy Bas qolbasshysy Qasym-Jomart Toqaev bastaǵan el basshylyǵynyń, sondaı-aq Іshki ister mınıstrligi men Ulttyq ulan Bas qolbasshylyǵy jáne «Shyǵys» óńirlik qolbasshylyǵynyń qamqorlyǵy dep bilgeısizder. Ulttyq ulannyń áskerı qyzmetshileri árqashan jeke adamnyń, qoǵamnyń jáne memlekettiń qaýipsizdigin qorǵaıdy. Osy baǵytta abyroıly qyzmet ete berińizder. 5512 áskerı bóliminde qoǵamdyq tártipti saqtaý boıynsha jedel maqsattaǵy batalon ǵana emes, sonymen qatar arnaıy maqsattaǵy bólimsheler de bar. Mundaı jańashyldyqtar aldaǵy ýaqytta da jalǵasyn tabady», dedi Ulttyq ulan Bas qolbasshysy, general-leıtenant Erkin Botaqanov.
Endi jedel polktiń sarbazdary jıhazdary men jabdyqtary ornatylǵan jańa modýldik ǵımarattarda turady. Ár kazarma 100 sarbazǵa arnalǵan. Jańa turǵyn úılerdiń ereksheligi kóp: olar blokty-modýldi, tikburyshty tıpti jáne árqaısysynyń aýdany 1200 sharshy metrdi quraıdy. Avtotehnıkalardy saqtaýǵa arnalǵan bokstardaǵy edennen tóbege deıingi bıiktik – keminde tórt metr, qalǵan úı-jaılardyń bıiktigi – keminde úsh metr.
5512 áskerı bólimi Qazaq KSR Mınıstrler Keńesiniń 1989 jylǵy 23 qazandaǵy qaýlysymen Pavlodar qalasynda jeke arnaıy motorly mılıtsııa batalony retinde jasaqtalǵan. 2021 jyldyń 9 jeltoqsanynda batalon polk bolyp qaıta quryldy. 5512 áskerı bóliminiń 200-den asa áskerı qyzmetshisinen turatyn jeke quramy Pavlodar qalasynda 80 jaıaý patrýldeý marshrýttarynda jáne 6 avtomobıl marshrýttarynda qyzmet atqarady.
