Pavlodarda áskerge shaqyrylýshylardy shyǵaryp salýdyń jańa dástúri pash etildi
PAVLODAR. KAZINFORM -Pavlodarda áskerge shaqyrylýshylardy Ulttyq ulan men Shekara qyzmeti qataryna saltanatty túrde shyǵaryp salý rásimi ótti.
Ertis-Baıan óńiri - QR Qorǵanys mınıstrliginiń «Sarbaz joly» dástúrin qoldaǵan elimizdegi úshinshi aımaq bolyp otyr. Joba «Adal azamat – Sarbaz – Otan qorǵaýshy» bastamasy aıasynda júzege asyrylyp jatyr.
Memlekettik rámizder alańynda uıymdastyrylǵan saltanatty rásimge óńir basshysy Asaıyn Baıhanov, Qorǵanys mınıstrliginiń ókilderi, vedomstvonyń aqparattyq-túsindirý tobynyń ofıtserleri, Qorǵanys isteri jónindegi departament mamandary, áskerı-tehnıkalyq mektep kýrsanttary, Qarýly kúshterdiń ardagerleri, sondaı-aq áskerge shaqyrylýshylardyń ata-analary men jaqyndary qatysty.
Óńir basshysy jas sarbazdarǵa aqjoltaı tilegin bildirip, áskerı qyzmettiń jastardyń boıynda jaýapkershilik, tártip jáne azamattyq qasıetterdi qalyptastyrýdaǵy mańyzyna toqtaldy.
- Áskerı mindet – qasıetti borysh. Búgin ata-ana úshin de, sarbazdar úshin de tolǵanysy mol erekshe kún. Balalaryńyzdy laıyqty azamat etip tárbıeleýge qosqan úlesterińiz úshin ata-analarǵa alǵys aıtamyn! – dedi Asaıyn Baıhanov.
Іs-shara barysynda Qorǵanys mınıstriniń tárbıe jáne ıdeologııalyq jumys jónindegi orynbasary, general-maıor Asqar Mustabekov Ertis-Baıan óńiri «Sarbaz joly» jobasyn iske asyrýǵa qoldaý kórsetkenin atap ótti.
- Pavlodar – eńbekqor ári maqsatshyl adamdardyń ólkesi. Sizder de bilimdi, tártipti, myqty ári eline paıdaly azamat bolýǵa umtylyńyzdar. Osy turǵydan alǵanda, ásker sizder úshin ómirdiń, tártip pen jaýapkershiliktiń mektebine aınalady, – dedi Asqar Mustabekov.
Onyń aıtýynsha, jergilikti atqarýshy organdarmen birlesken jumystyń mańyzdy baǵyttarynyń biri – áskerı qyzmetin aıaqtaǵan jastarǵa óńirdegi iri kásiporyndarǵa jumysqa ornalasýǵa járdemdesý.
Joba aıasynda ásker men áskerı qyzmetshilerdiń otbasylary arasyndaǵy baılanysty nyǵaıtýǵa, sondaı-aq jastardyń boıynda tártip, jaýapkershilik pen otansúıgishtik qasıetterdi qalyptastyrýǵa basymdyq beriledi.
Áskerge attanǵan pavlodarlyqtar Astana, Almaty, Qaraǵandy jáne Semeı qalalarynda ornalasqan áskerı bólimderde qyzmet atqarady.
Eske sala keteıik, bıyl kúzde 1 200 aqtóbelik áskerge shaqyrylady.
