Pavlodarda asyl tuqymdy sharýashylyqtar alǵan sýbsıdııanyń qaıtarymy bar ma
PAVLODAR. KAZINFORM — Ertis boıynyń fermerleri asyl tuqymdy mal sharýashylyǵyn damytqany úshin memleketten byltyr 7,2 mlrd, bıyl 7,7 mlrd teńge sýbsıdııa alǵan.
Óńir halqy mıllıardtaǵan qarajattyń qaıtarymyn qanshalyqty sezine alyp otyr?
Asyl tuqymdy iri qaranyń tek urǵashylaryn ósirýmen aınalysatyn 168-den astam sharýashylyq bar. Olardyń qolynda 74 myńnan astam bas mal bar. Et baǵytyndaǵy asyl tuqymdy iri qara maldan qazaqtyń aqbas tuqymy, gereford, aberdın-angýs, áýlıekól tuqymdaryn, al sút baǵytyndaǵylardan sımmental, golshtın, qyzyl dala tuqymdary keń taralǵan.
2025 jyly Eýropadan jáne Reseıden sút baǵytyndaǵy 812 bas golshtıno-frız tuqymdy iri qara ákelingen. Atap aıtqanda, «Agro-Damý» JShS Germanııadan 98 bas, «Úshterek jáne K» JShS Reseıden 129 bas, «Kronos Pavlodar» JShS 420 bas, al «Andas Agro» JShS Danııadan 165 bas (sońǵy ekeýi Danııadan) jetkizgen.
— Mal sharýashylyǵyn sýbsıdııalaý qaǵıdasyna sáıkes, TMD elderinen satyp alynǵan sútti jáne sútti-etti baǵyttaǵy asyl tuqymdy iri qaranyń ár urǵashysyn satyp alǵany úshin 225 myń teńge, Eýropa elderinen jetkizilgenderge 400 myń teńge sýbsıdııa qarastyrylǵan, — deıdi óńirlik aýyl sharýashylyǵy basqarmasy basshysynyń orynbasary Tólegen Kósherbaev.
Qazirgi ýaqytta aımaqta Zeńgi babanyń 471,6 myń tuqymy bar. Onyń ishinde 417,6 myńy — sút baǵytynda. Іri qarany ımporttaý arqasynda janýarlardyń ónimdiligi de artyp keledi. 2025 jyl sońynda aýyl sharýashylyǵy kásiporyndarynda bir saýyndy sıyrdan alynatyn ortasha sút ónimi 5 413 kg-nan 5 869 kg-ǵa deıin óskeni baıqalǵan. Jyl basynan 220,5 myń tonna sút óndirilip, bul ótken jylmen salystyrǵanda 8,4%-ǵa artqan.
— 2024 jyly mal sharýashylyǵyn sýbsıdııalaý úshin sharýa qojalyqtaryna 7,2 mlrd teńge sýbsıdııa berildi (onyń ishinde asyl tuqymdy mal sharýashylyǵyn damytý úshin 3,3 mlrd teńge), al bıyl 7,7 mlrd teńge (asyl tuqymdy mal sharýashylyǵyn damytý úshin 2,7 mlrd teńge) tólendi. Taýarlyq sút fermasyn salý boıynsha quny 10 mlrd teńgege 2 joba iske qosyldy. Taǵy bireýiniń qurylysy jyl sońyna deıin aıaqtalady, — dep qosty basqarma ókili.
Mamandar asyl tuqymdy sharýashylyqtar et boıynsha jospardy artyǵymen oryndap otyrǵanyn aıtady. Jyl saıyn shamamen 26 myń tonna jýyq et óndiriledi. Al óńir turǵyndarynyń jyldyq suranysy — 15,1 myń tonna. Oblys halqynyń tutyný qajettiligi 172%-ǵa oryndalyp otyr degen sóz.
Tek tapsyrylatyn sút boıynsha oblys ekonomıkasy áli de jobalyq qýattardy qajetsinedi. Qazirgi ýaqytta jergilikti zaýyttarǵa tapsyrylatyn súttiń 72%-yn ǵana taýarly sút fermalary qamtamasyz etip otyr.
Aıta ketelik Pavlodar sharýalary rekordtyq 1,1 mln tonna astyq jınaǵan edi.