Keleshek mektebinde oqıtyn ár balaǵa qansha qarjy jumsalady
PAVLODAR. KAZINFORM — Qazirgi ýaqytta № 48 mektepte jalpy sany 1045 bala bilim alyp jatyr. Mektep tolyqtaı qazaq tilinde bilim beredi.
Bıyl kúzde Pavlodarda ashylǵan alǵashqy «Keleshek mektebin» ustap turý shyǵyndary jergilikti bıýdjet esebinen qarjylandyrylyp otyr. Mektep qalanyń eń qarqyndy damyp kele jatqan aýdandarynyń biri — Dostyq shaǵynaýdanynda ornalasqan. Bul aýdanda oqýshy orynynyń tapshylyǵy baıqalyp kelgen. Jańa bilim uıasynyń ashylýy jaqyn mańdaǵy bilim ordalarynyń júktemesin azaıtyp, 1200 oqýshyny zamanaýı jáne jaıly oqý jaǵdaıymen qamtamasyz etedi dep kútilgen.
Belgili bolǵandaı, qazir munda 1045 oqýshy oqıdy.
— Jańa mektepti ustaý shyǵyndary jergilikti bıýdjet esebinen qarjylandyrylady. QR Bilim jáne ǵylym mınıstriniń 2017 jylǵy 27 qarashadaǵy № 597 buıryǵymen bekitilgen jan basyna shaqqandaǵy normatıvtik qarjylandyrý ádistemesine sáıkes, 1 balany jylyna ustaý shyǵyny — 436,6 myń teńge. Deıturǵanmen oqý deńgeılerine baılanysty, ıaǵnı, bastaýysh, negizgi jáne joǵary synyptarda túrli standarttar bar. Baǵdarlamalardyń kúrdeliligi men muǵalimderdiń júktemesi ártúrli. 1-4 synyp oqýshylary úshin jylyna bir balaǵa normatıv 436 582 teńgeni, 5-9 synyp oqýshylary úshin 596 274 teńgeni, 10-11 synyp oqýshylary úshin 712 331 teńgeni quraıdy. Jylyna bir balaǵa ortasha normatıv 581 729 teńgeni qurap otyr, — dep habarlady óńirlik bilim berý basqarmasynan.
Bilim uıasynda búginde 81 ustaz jumys isteıdi. Olardyń eńbekaqysy da jan basyna shaqqandaǵy qarjylandyrý esebinen tólenedi. Anyqtaǵanymyzdaı, normatıvtik qarjylandyrý ádistemesi shyǵyndardyń kelesi túrlerinen quralady.
— eńbekaqy (jalaqy, salyqtar, ótemaqy tólemderi, yntalandyrý komponenti, pedagogtar men ákimshilik- basqarý personalynyń jyl saıynǵy jalaqysynyń artýy);
— oqý shyǵyndary (oqý quraldaryn, mektep jıhazdaryn, sporttyq jabdyqtardy jáne t. b. satyp alý);
— ǵımaratty ustaý (aǵymdaǵy jóndeý, ǵımaratqa qyzmet kórsetý, dezınfektsııalaý, kógaldandyrý, qoqys shyǵarý, t. b.);
— amortızatsııalyq shyǵystar (kúrdeli jóndeý jáne negizgi quraldardy satyp alý).
Eske sala keteıik, Qazaqstanda 232 jańa mektep salynyp jatyr.
