Pavlodarda ashana kassıri 7 mln teńgeden astam somany zańsyz ıemdengen
PAVLODAR. KAZINFORM - Pavlodarda ashana kassıri klıentterden tapsyrys úshin tólemdi óziniń bank kartasyna qabyldap, úsh jyl ishinde 7,3 mln teńgeni urlaǵan.
Sot materıaldaryna súıensek, áıel ashanada 2014 jyldan bastap jumys istegen. Alǵashqyda naýbaıshy bolyp eńbek etse, 2020 jyly kassır qyzmetine taǵaıyndalǵan.
Ol kezde ashanadaǵy qolma-qol aqshasyz tólemder mekeme ıesiniń shotyna aýdarylǵan. Keıin salyq organdary tarapynan baqylaýdyń kúsheıýine baılanysty ashana qojaıyny klıentterden tólemdi jeke shotyna qabyldaýǵa tyıym salady. Osydan keıin kassır áıel tapsyrys berýshilerge óziniń telefon nómirin usynyp, tólemderdi óz shotyna qabyldaı bastaǵan.
Alaıda ol 2020-2023 jyldar aralyǵynda túsken qarajattyń bir bóligin ashana ıesine bermeı, ózi alyp qalyp otyrǵan.
- Kassırdyń zańsyz áreketi 2024 jylǵy qańtarda áshkere bolǵan. Otbasylyq jaǵdaıyna baılanysty jumysqa shyǵa almaǵan kezde onyń ornyna kassada býhgalter turǵan. Sol kezde býhgalter klıentterdiń tapsyrys aqysyn kassırdiń nómirine aýdaryp jatqanyn baıqap, bul týraly ashana basshysyna habarlaǵan, - delinedi sot materıaldarynda.
Kassır jumysqa shyqqannan keıin odan bank shotyndaǵy úzindi kóshirme suratylǵan. Nátıjesinde klıentterden túsken aýdarymdar eseptelip, keltirilgen zalal kólemi 7,3 mln teńge bolǵany anyqtalǵan.
Atalǵan derek boıynsha polıtsııa qylmystyq is qozǵaǵan. Sotta burynǵy kassır óz kinásin moıyndaǵan. Sonymen qatar ol sot úkimi shyqqanǵa deıin keltirilgen materıaldyq shyǵyndy tolyq ótegen.
Pavlodar soty áıeldi kináli dep tanyp, oǵan úsh jyl tórt aı merzimge shartty jaza taǵaıyndady. Jaza QR jańa Konstıtýtsııasynyń qabyldanýyna oraı jarııalanǵan raqymshylyq týraly zańnyń qoldanylýyn eskere otyryp belgilengen.
Eske sala keteıik, Aqmola oblysynda 20 adamdy aldap, 45 mln teńgeden astam shyǵyn keltirgen áıel sottaldy.
