Pavlodarda áriptesterimen daýys kótere sóılesken sheneýnikti jazalaý usynyldy

Pavlodar oblysy ádilet departamenti basshysynyń orynbasary Aıdyn Sámenqulov bıylǵy aqpan aıynyń sonyńda ótken qyzmettik jınalys barysynda qol astyndaǵy qyzmetkerlerge daýys kótere sóılep, áriptesteriniń ar-namysy men qadir-qasıetine nuqsan keltirýi múmkin sózderdi qoldanǵan. Áriptesteri ony dıktofonǵa jazyp alyp, aıǵaq retinde usynǵan.

- Árıne, ol jerde bylapyt sózder joq. Biraq sizdiń sózderińizden menmendik, tákapparlyq baıqalady. «Sen kimsiń?», «Atyń kim?» dep qaıta-qaıta aıtasyz. Keıbir jaıttardy 10 ret qaıtalap suraısyz. Munyń barlyǵyn jattap alýǵa bolar edi ǵoı. Onyń ústine bul sizben kem degende tórt jyl birge jumys isteıtin qyzmetkerińiz. Sizdiń sóz qoldanysyńyzda memlekettik qyzmetshige jatpaıtyn tákapparlyq bar, - dep atap ótti Memlekettik qyzmet isteri departamenti ádep jónindegi keńesiniń múshesi Amangeldi Hamzın.

Departament basshysynyń orynbasary kinásin moıyndaǵan joq. Aıdyn Sámenqulov shaǵymnyń tek bir bólim qyzmetkerlerinen túskenin túsindirdi. Sondaı-aq ol bul tekseristiń túp-tórkini óziniń ádepsiz minez-qulqyna qatysty emes dep topshylaıdy.

- Bul teginnen tegin emes. Árıne, bul jerde aıtý orynsyz bolar, biraq bul meniń qyzmetime baılanysty dep oılaımyn. Oqýdan soń qyzmetke kelgenimde Ádilet mınıstrliginen maǵan ózge oblystan qyzmet usyndy. Biraq men bas tarttym. Menińshe, bul sonymen baılanysty, - dep óz oıymen bólisti sheneýnik.

Ádep jónindegi keńes músheleri otyrys qorytyndysy boıynsha sheneýnikke «qatań sógis» túrindegi jaza qoldanýdy usyndy.

Eske sala keteıik, Pavlodarda jol kútimine nemquraıly qaraǵan sheneýnikter jaýapkershilikke tartyldy.