Pavlodarda ardager pedagogtarǵa alǵys bildirý aktsııasy bastaldy
PAVLODAR. QazAqparat –Pavlodar qalasynyń bilim bólimi men qalalyq bilim qyzmetkerleriniń kásipodaq uıymy birlesip, 25 tamyzdan bastap «Ustazǵa taǵzym» atty aktsııa uıymdastyrýda, dep habarlaıdy QazAqparat Pavlodarnews.kz saıtyna silteme jasap.
Qalalyq bilim bóliminiń bas mamany Aıgúl Bıhııanova bıyl buryndary bilim berý uıymdarynda basshy bolyp eńbek etken ardagerlerdi quttyqtaıtyndaryn atap ótti.
- Aktsııanyń maqsaty - jas urpaqty tárbıeleýge qosqan úlesteri úshin pedagogıkalyq eńbek ardagerlerine alǵys bildirý. Ardagerlerdiń úılerine baryp, quttyqtaý hattary men qundy syılyqtar taratylatyn bolady. Jańa oqý jylynyń qarsańynda áriptesterdiń, ata-analar men oqýshylardyń qurmetine ıe bolǵan pedagogıkalyq eńbek ardagerlerine alǵysymyzdy bildiremiz, - dedi Aıgúl Bıhııanova.
Ardager pedagogtarǵa syılyqtardy bilim berý bóliminiń mamandary men qaladaǵy mektep dırektorlary úılerine baryp tabystaýda
Búgin shahardaǵy bilim salasynda 50 jylǵa jýyq qyzmet atqarǵan Kamal Dııarova syılyqqa ıe boldy. Ardager ustaz eńbek jolyn muǵalim bolyp bastap, dırektorlyq qyzmetten zeınetke shyqqan.
Pavlodardaǵy pedagogıkalyq ınstıtýtty aqtaǵannan keıin 1971 jyldan bastap muǵalim bolyp eńbek ettim. №3 keshki jastar mektebinde ustaz bolyp, keıin ındýstrıaldy aýdandyq bilim berý bóliminde ınspektor, dırektordyń orynbasary qyzmetin atqardym. Odan keıin №14 mektepte dırektor, qalalyq bilim berý bólimi basshysynyń orynbasary, №22 mektep dırektory bolyp jumys jasadym. 2008 jyly zeınetke shyqtym. Bul mamandyqtyń qyzyǵy da, shyjyǵy da bar. Bar kúshimdi, bilimimdi elimizdiń bolashaǵyna, balalarǵa saldym. Onymdy maqtan etemin. Ómirime rızamyn. Qaıta múmkindik týsa, eńbek jolymdy muǵalim bolyp bastaıtyn edim, - deıdi Kamal Dııarova.
Sonymen qatar, qaladaǵy balabaqshalarda eńbek etip, pedagogıkalyq salaǵa 38 jylyn arnaǵan Lıýbov Smırnovaǵa da syılyq tabystaldy.
- Maǵan balalarmen jumys jasaǵan unaıdy. Alǵash jumysty tárbıeshi bolyp bastap, qalamyzdaǵy №115 jáne 165 balabaqshada 15 jyldan basshylyq jasadym. Osylaı ardagerlerdi eske alyp, umytpaǵandarǵa alǵys aıtamyn. Qazir ózim mektepke deıingi bilimniń ardagerler keńesiniń tóraıymymyn. Ardagerlerge kóńil bólip qaraǵannyń ózi, jyly sózder aıtqannyń ózi olarǵa qýanysh syılaıdy, - dedi Lıýbov Smırnova.
Aktsııa aıasynda ardager pedagogtarǵa alǵys bildirý qazan aıyndaǵy Muǵalimder kúnine deıin jalǵasady. 1 qyrkúıekten bastap mektep dırektorlary kún saıyn syılyqtar tabystaıtyn bolady.
Eske salaıyq, Pavlodar qalasynda 300-den astam pedagogıkalyq eńbek ardageri turady.
