Pavlodarda aralas mektepterdiń úlesi azaımaı otyr
PAVLODAR. KAZINFORM - Jańa oqý jylynda óńirdegi 362 jalpy bilim beretin mektepte 116 myńnan astam oqýshy bilim alady dep josparlanyp otyr. Osynshama oqýshynyń 52 myńnan astamy, ıaǵnı shamamen 45 paıyzy ǵana oqýdy memlekettik tilde jalǵastyrady.
Oblysta mektepterdiń oqytý qurylymy geografııalyq turǵydan birkelki emes. Basym bóligin aralas bilim berý mekemeleri (175 mektep) qurap otyr. Taza qazaq tilinde oqytatyn mektepter sany 139 bolsa, orys tilinde bilim beretin 48 mektep jumysyn jalǵastyryp otyr. Ásirese úsh qalada aralas mektepterdiń úlesi joǵary.
Oblystyq bilim berý basqarmasynyń málimetinshe, Pavlodar qalasyndaǵy 59 mekteptiń tek 17-si taza qazaq mektebi. Munda oqýshylardyń 33,2 paıyzy ǵana (shamamen 17 myń bala) qazaq tilinde oqıdy. Aımaqtyń soltústik jáne shekaralyq aýdandarynda da orys jáne aralas mektepter basymdyqqa ıe ekeni baıqalady.
Resmı statıstıkaǵa súıensek, Ýspen aýdanynda – 2, Tereńkólde – 5, Jelezın men Sharbaqtyda 6 qazaq mektebi ǵana jumys isteıdi. Mysaly, Ýspen aýdanyndaǵy 1824 oqýshynyń 960-y orys mektepterinde oqysa, aralas mektepterdegi balalardyń 434-i orys synyptarynda bilim alyp jatyr. Osyǵan uqsas jaǵdaı Jelezın men Sharbaqty aýdandaryna da tán.
Deıturǵanmen mamandar Ertis-Baıan óńirinde qazaq tildi synypty tańdaıtyn jas urpaqtyń qatary jyl ótken saıyn kóbeıip kele jatqanyn alǵa tartady. Bıyl birinshi synypqa qabyldanǵan oqýshylardyń 52 paıyzy qazaq synyptarynyń partasyna jaıǵasqan. Ózge ulttyń 10 balasy qazaq synyptaryn tańdaǵan.
Eske sala keteıik, Pavlodarda 10 shaǵyn jınaqty mektepke JI júıesi engiziledi.
