Pavlodarda antıseptık ishken qyz kóz jumdy
PAVLODAR. QazAqparat - Pavlodarda antıseptık ishken qyzdardyń biri kóz jumdy, dep habarlaıdy Pavlodarnews.kz.
Oblystyq densaýlyq saqtaý basqarmasynyń málimdeýinshe, 2 qańtar kúni saǵat 18:30-da oblystyq balalar aýrýhanasyna jedel járdemmen 2003 jyly týǵan qyz bala jetkizilgen. Ol «Oblystyq ómirlik qıyn jaǵdaıǵa tap bolǵan balalardy qoldaý ortalyǵynan» es-tússiz kúıde jetkizildi.
- Qyz bala belgisiz zattyń ýly áseri dıagnozymen tústi. Bas mıynyń isinýimen jansaqtaý bólimine jatqyzyldy. Intensıvti terapııa bastaldy. Jasalǵan emdeý sharalaryna qaramastan saǵat 20:00-de júregi toqtady. 30 mınýttyq jansaqtaý áreketteri nátıje bermedi, - dedi basqarmada.
2004 jyly týǵan taǵy 2 qyz bala sol kúni saǵat 21:40-ta aýrýhanaǵa ýlaný dıagnozymen ortasha kúıde túsken.
Olarǵa tolyq kólemde medıtsınalyq kómek kórsetildi. Ekeýi de statsıonardan shyǵaryldy.
Qyzdar 1 qańtar kúni keshki saǵat 20:30 shamasynda 2,5 staqan «Antıseptık - MD-1» zatyn sýmen aralastyryp ishkenderin aıtqan.
- Qyzdardyń aıtýynsha, túndi tynysh ótkizgen. Eshteńe mazalamaǵan. Alaıda, tań atysymen júrekteri aınyp, qusý bastalǵan. Ortalyqtyń medıtsınalyq qyzmetkerleri men tárbıeshileri bul oqıǵa týraly bilmegen. 2 aqpan kúni saǵat 20:30-dan keıin qyzdar jedel járdem shaqyrǵan, - dedi basqarmada.
