Pavlodarda anasy terezeden laqtyryp jibergen jetkinshek aýrýhanadan shyqty

PAVLODAR. KAZINFORM — Dárigerler ul balanyń jaǵdaıy qanaǵattanarlyq ekenin habarlady. Biraq ol áli de bolsyn tósek rejımin saqtaýy kerek. 

Pavlodarda anasy terezeden laqtyryp jibergen jetkinshektiń biri — 7 jasar ul balanyń jambas súıegi synǵan. Ol buǵan deıin oblystyq balalar aýrýhanasynda em qabyldap, qatań túrde tósek rejıminde bolyp kelgen edi.

— Balanyń jaǵdaıy jaqsaryp, oń dınamıka kórsetýi sebepti aýrýhanadan shyǵaryldy. Biraq ol bir aıdaı ýaqyt tósek rejımin saqtaýy kerek. Odan soń bir jyldaı ońaltý sharalarynan ótedi, — dep habarlady Pavlodar oblysy densaýlyq saqtaý basqarmasynyń baspasóz qyzmetinen.

Al balanyń anasy áli de jansaqtaý bóliminde jatyr.

— Anasynyń jaǵdaıy aýyr. Ókshe súıekteri men oń jaq ıyq súıeginiń synýyna baılanysty ota jasaldy. Patsıent esin biledi, — dep málimdedi densaýlyq saqtaý basqarmasynan.

Eske sala keteıik, 30 shilde kúni Pavlodarda áıel eki balasyn terezeden laqtyryp, ózi de sekirip ketken. 

Keıin áıel men eki balasynyń terezeden qulaýy boıynsha qylmystyq is qozǵaldy. 

Al 1 tamyz kúni bıiktikten qulaǵan balalardyń biri kóz jumdy. 

Dárigerler tiri qalǵan jetkinshektiń jaǵdaıy týraly aıtqan.