Pavlodarda Ámire Qashaýbaevtyń daýysy jazylǵan kúıtabaq saqtalyp tur
PAVLODAR. KAZINFORM — Ánshiniń daýysy jazylǵan kúıtabaq — mýzeı qoryndaǵy sırek ári qundy jádigerdiń biri. 2002 jyly «Mýzeı qoryna» aktsııasy boıynsha qabyldanypty.
Buqar jyraý atyndaǵy ádebıet jáne óner mýzeıinde dara darynymen dala sahnasynan óner kógine samǵaǵan Ámire Qashaýbaevtyń daýysy jazylǵan kúıtabaq saqtaýly tur. Syrtynda M. T. Tashmýhamedov atyndaǵy Tashkent zavodynda shyǵarylǵany kórsetilgen.
Kúıtabaqtaǵy Ámire Qashaýbaevtyń daýysy 1925-1927 jyldary jazylǵan. Qaptamasynyń ekinshi jaǵynda óner zertteýshisi Jarqyn Shákárimovtiń mynandaı túsinigi berilgen: «Ámire Qashaýbaevtyń asqan ánshilik óneri Eýropa jurtshylyǵyna keńinen málim».
— Ánshi 1925 jyly Frantsııa eline baryp, asqaq daýysymen pań Parıjdi baǵyndyrǵan, al arada eki jyl ótken soń Maındaǵy Frankfýrt qalasy turǵyndaryn súısintedi. Ámireniń daýysy sol tusta jazylyp alynǵan eken. Biraq ol keıin iz-túzsiz ketip, biraz jyldar ótken soń baryp tabylady. Ótken jyly Ortalyq arhıvtiń dybys jazý qorynan fonograf valıgine jazylǵan Ámireniń oryndaýyndaǵy «Balqadısha», «Jalǵyz arsha», «Bes qarager», «Dýdar-aı», «Aǵash aıaq», «Úsh dos», «Smet» ánderi tabylyp, arada elý jyl ótken soń Ámire daýysyn qaıta tyndaýǵa múmkindik alǵan edik, — deıdi Buqar jyraý mýzeıiniń bólim basshysy Abzal Rymbek.
Kúıtabaqta sondaı-aq Ámireniń zamandastary Saparǵalı Begalınniń, Qazaq KSR Halyq artısteri Serke Qojamqulovtyń, Júsipbek Elebekovtiń estelik lebizderi bar. Akademık Álkeı Marǵulannyń Semeıdiń gýbernııalyq «Qazaq tili» gazetinde jaryq kórgen Ámireniń Parıj sapary týraly maqalasynan úzindi keltirilgen.
Jalpy Ámire Qashaýbaevtyń Ertis boıynyń óner tarlandarymen baılanysy týraly kóptegen málimet jazylyp ta, aıtylyp ta keledi. Teatr ónerin Júsipbek Aımaýytovtan úırense, daýylpaz aqyn Isa Baızaqovpen jan aıamas dos bolǵan.
Atap óterligi, Ámireniń qyzy Kúlásh Qashaýbaeva da ákesiniń jolyn qýyp, esimi dúıim elge málim ánshi bolǵan. Buqar jyraý mýzeıinde ánshiniń úkisi men kóılegi saqtalyp tur.
Eske sala keteıik, Pavlodarda Janbıke Shanınanyń portreti saqtalǵan.
