Pavlodarda alty jasar bala órtten kóz jumdy

PAVLODAR. QazAqparat - Pavlodarda bes bólmeli páter tolyǵymen janyp ketti. Jalyn kórshi úıge tarap, bir bala kóz jumdy, taǵy zardap shekkender bar, dep habarlaıdy QazAqparat tilshisi.

«Saǵat 01:03-te 101 pýltine Altaıskaıa kóshesi, 9/2 mekenjaıynda tórt páterli jataqhanadan órt shyqqany týraly habar tústi», - dep habarlady Pavlodar oblysy tótenshe jaǵdaılar departamenti baspasóz qyzmetinen.

Bes bólmeli páter tolyǵymen órtenip, shatyry opyrylyp tústi.

Eki bólmeli páterdiń irgeles qabyrǵalary, jalpy aýdany 150 sharshy metrdi quraıtyn shatyrdyń aǵash konstrýktsııalary jartylaı opyrylǵan.

«Páterdegi órtti sóndirý kezinde 2016 jyly týǵan ul balanyń denesi tabyldy. Órt sóndirýshiler 3-shi páterden eki 50 lıtrlik gaz ballony men 4-shi páterden bir 50 lıtrlik gaz ballonyn shyǵardy», - dep tolyqtyrdy TJD.

Oqıǵa saldarynan zardap shekken 1983 jyly týǵan áıel birinshi qalalyq aýrýhanaǵa, al 1962 jylǵy úı ıesi oblystyq aýrýhanaǵa jetkizildi.

Apattar medıtsınasy ortalyǵynyń qyzmetkerleri zardap shekken taǵy bir adamdy tekserdi. Ol aýrýhanaǵa jatqyzylǵan joq.

«Jalyn saǵat 02:06-da aýyzdyqtalyp, 03:01-de tolyq sóndirildi. Órttiń shyǵý sebebi, kelgen shyǵyn anyqtalyp jatyr. Órtti sóndirýge 40 órt sóndirýshi men 9 tehnıka jumyldyryldy», - dep habarlady vedomstvodan.

Foto jáne vıdeo Pavlodar oblysy TJD