Pavlodarda alımentten jaltaryp júrgenderdiń kólikteri tartyp alynýda
PAVLODAR. QazAqparat - Pavlodar oblysynyń ákimi Bolat Baqaýov alıment tólemeı júrgendermen kúrestiń nátıjeleri týraly aıtty, dep habarlaıdy QazAqparat pavlodarnews.kz saıtyna silteme jasap.
Óńir basshysynyń aıtýynsha, ótken aptada Pavlodar oblysynda aıyp turaǵyna alıment tólemeı júrgenderdiń 4 kóligi jetkizilgen.
«Boryshkerlerdiń biri sol sátte 520 myń teńge qaryzyn japty. Taǵy bir boryshker qaryzynyń ornyna kóligin áıeliniń atyna aýdardy. Qalǵan eki avtomobıl baǵalaýdan keıin satýǵa qoıylady. Túsken aqsha qaryzdardy jabýǵa jumsalady», - dep jazdy B.Baqaýov Instagram jelisindegi paraqshasynda.
Eske salaıyq, oblys basshysy kópbalaly analardyń máselesi boıynsha bir apta buryn ótken jıynda alımentten jaltaryp júrgendermen kúres júrgiziletinin ýáde etken bolatyn. Sonymen qatar ol óz balalary aldyndaǵy mindetten eshkim qutylyp ketpeýi úshin sot oryndaýshylardyń jumysyn kúsheıtýdi jáne profılaktıkalyq sharalarǵa din qyzmetkerlerin jumyldyrýdy tapsyrdy.
