Pavlodarda alıment tólemegen azamattardyń qaryzy 21 mln teńgege jetti
PAVLODAR. QazAqparat – Pavlodar oblysynda polıtseıler alıment boıynsha qaryzy bar azamattardyń 56 kóligin aıyppul turaǵyna jiberdi, dep habarlaıdy «QazAqparat» HAA tilshisi.
«Bıylǵy toǵyz aıda oblystyq polıtsııa departamentiniń jergilikti polıtsııa qyzmetkerleri alıment boıynsha 21 mıllıonǵa jýyq qaryzy bar azamattardyń 56 avtokóligin aıyppul turaǵyna jiberdi», - deıdi Pavlodar oblysy polıtsııa departamentiniń baspasóz qyzmetinde.
Mysaly, polıtsııa kapıtany Medet Qaıyrbekov balalary úshin 375 568 teńge kóleminde alıment tólemegen 43 jastaǵy pavlodarlyq azamattyń «OPEL FRONTERA» avtokóligin ustady.
«Avtokólik Pavlodar qalasynyń aıyppul turaǵyna jiberildi. Er adam alımentti tólegenshe jaıaý júre turady nemese sot oryndaýshylary onyń avtokóligin saýdaǵa salady», - dep málim etti vedomstvodan.
Avtor: Anton Gagarın
