Pavlodarda alıment bereshegin óndirmegeni úshin ádilet departamenti men sot oryndaýshysyna aıyppul salyndy

PAVLODAR. KAZINFORM — Pavlodar oblysynda sot sheshimin ýaqytynda oryndamaǵany úshin Ádilet departamenti men jeke sot oryndaýshysyna jalpy somasy 302 750 teńge kóleminde aqshalaı óndirip alý sharasy qoldanyldy.

SQO-da sot oryndaýshylar 133,5 mln teńge tabysty jasyrǵan
Foto: gov.kz

Іstiń mán-jaıyna súıensek, 2012 jyly sot sheshimimen azamat K.-dan balasyn asyraý úshin tabysynyń tórtten bir bóligi mólsherinde alıment óndirilgen. 2017 jylǵy qańtarǵa qaraı bereshek 483 069 teńgege jetken.

Keıin sot boryshkerdiń alıment mólsherin tabysynyń altydan bir bóligine deıin tómendetken. Osyǵan baılanysty memlekettik sot oryndaýshysy 2017 jyly atqarýshylyq is júrgizýdi toqtatqan. Alaıda ótelmegen bereshek bolǵanyna qaramastan, atqarýshylyq qujat qaıtarylmaǵan.

2022 jyly iske kirisken jeke sot oryndaýshysy 2019 jylǵy qyrkúıekten 2022 jylǵy qazanǵa deıingi alıment bereshegin 1 mln 247 myń 605 teńge dep eseptegen. Al 2017-2019 jyldar aralyǵyndaǵy qaryzdy tek sońǵy úsh jyl úshin ǵana esepteýge bolatynyn aıtyp, óndirip alýdan bas tartqan.

— Balanyń anasy sotqa júgingen. Sot memlekettik sot oryndaýshysynyń 2017 jyly atqarýshylyq is júrgizýdi toqtatýyn zańsyz dep tanyp, qaýlynyń kúshin joıdy. Sondaı-aq jeke sot oryndaýshysyna 2017-2019 jyldardaǵy bereshekti balanyń quqyqtaryn eskere otyryp esepteý mindetteldi. Alaıda sot sheshimi 2026 jylǵy maýsymda zańdy kúshine engenimen, Ádilet departamenti men jeke sot oryndaýshysy ony belgilengen merzimde oryndamaǵan, — dep habarlady oblystyq mamandandyrylǵan aýdanaralyq ákimshilik sotynan.

Osyǵan baılanysty sot Ádilet departamentine 216 250 teńge, al jeke sot oryndaýshysyna 86 500 teńge kóleminde aqshalaı óndirip alý sharasyn qoldandy. Qarajat memleket kirisine tólenip, sot sheshimi oryndaldy.

Eske sala keteıik, Pavlodar oblysynda alıment tólemegen 24 boryshker qylmystyq jaýapqa tartyldy.